DILI, 19 outubru 2021 (TATOLI)—Sekretaria Estadu Protesaun Sivil, kolabora ho parte Universidade Nasional Timor Lorosa’e (UNTL) no NGO BELUN, hodi fahe informasaun ba estudante universitáriu, Fakuldade Siénsia Sosiál, kona-ba prevene konflitu.
Tuir Dekanu Fakuldade Siénsia Sosiál, Camilo Ximenes Almeida, atividade ne’e importante tanba liuhosi meiu ida-ne’e bele partilla informasaun importante, tanba ne’e presiza partisipasaun másimu estudante sira.
“Ha’u sempre la’o iha suku sira no haree kestaun barak akontese. Tanba ne’e ha’u husu karik bele, ita kria netik lalehan ida iha ita-nia suku labele to’o tiha universidade maka forma fali grupu oioin, hodi destroi fali ema seluk nia moris,” Dekanu universitáriu, informa iha salaun Fakuldaade Siénsia Sosiál, Caicoli, tersa ne’e.
Nia konsidera, atividade ne’e importante atu muda ema ida-idak ninia komportamentu.
“Ema bele matenek to’o iha ne’ebé maibé kuandu laiha komportamentu di’ak mo valór laiha mak sek la garante, ne’e duni edukasaun sívika importante ba estudante sira iha universidade atu ajuda no tulun ema iha futuru.
Iha sorin seluk, Diretór Nasionál Prevensaun Konflitu Komunitáriu, António Viegas, dehan, Juventude mak autór ba páz no estabilidade atu garante jerasaun foun lori nasaun ba futuru di’ak.
Nu’udar jerasaun foun ne’ebé sai ona ema intelektuál, tanba integra ona iha instituisaun ensinu superiór kampus UNTL Fakuldade Siénsia Sosiál, tenke sai ema ne’ebé iha misaun no vizaun ne’ebé luan. buka atu hamutuk hodi lori páz, estabilidade no unidade.
Antes ne’e, SEPS realiza ona diseminasaun informasaun ba estudante iha Instituisaun Ensinu Superiór, ne’ebé akontese ona ba Universidade da Páz (UNPAZ), UNTL no sei halo mós iha Instituisaun Superiór Cristal (ISC).
Jornalista : Tomé Amado
Editora : Julia Chatarina
