DILI, 20 outubru 2021 (TATOLI)—Governu liuhosi reuniaun Konsellu Ministru iha kuarta ne’e, delibera hodi solisita Prezidente Repúblika (PR), Francisco Guterres ‘Lú Olo’, hodi renova deklarasaun Estadu Emerjensia (EE) ba dala-XIX loron 30, ne’ebé hahú hosi tuku 00:00 loron outubru 2021 to’o tuku 23:59 loron 28 novembru 2021.
EE ne’ebé efetua hosi Dekretu PR númeru 81/2021, loron 28 setembru, hodi hatán ba pandemia COVID-19 no EE ba dala-XVIII ne’ebé vigora abranje iha territóriu nasionál tomak entre tuku 00:00 loron 30 setembru 2021 to’o oras 23:59 loron 29 outubru.
“Ho hanoin kauza determinante ne’ebé justifika ona, deklarasaun Estadu Emerjénsia no ninia renovasaun sira kontinua mantein, atubele evita no neutraliza risku propagasaun sira hosi variante foun SARS-CoV-2, no nune’e bele proteje saúde públika no kapasidade resposta hosi Sistema Nasionál Saúde, Governu propoin ba Prezidente Repúblika halo renovasaun Estadu Emerjénsia nian, permite suspensaun ka restrisaun ba direitu no garantia fundamentál balun,” Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu, iha Palásiu Governu.
Notísia relevante: Medida ezekusaun EE da-XVIII iha alterasaun tolu
Desizaun ne’e ezekutivu sira foti hafoin analiza aprezentasaun pontu situasaun epidemiolójika país hosi Koordenadór Sala Situasaun, Sentru Integradu Jestaun Krize (CIGC, sigla portugés), kona-ba pontu situasaun epidemiolójika país.
Governu sei nafatin aplika EE iha fulan-novembru, maibé sei ajusta medida ezekusaun, ligadu ho situasaun rai-laran tanba situasaun mellora, númeru vasinasaun aumenta no númeru infetadu COVID-19 tun.
“Númeru vasinasaun presiza aumenta liután atu garante normalizasaun, tanba loron boot sira mós besik ona, ne’ebé sei halibur ema barak, tanba ne’e husu ba inan-aman sira, se ita hakarak situasaun ne’e bele normaliza, importante tebes atu vasina tanba rezultadu pozitivu ne’ebé rejista agora ne’e rezulta hosi medida hirak ne’ebé Governu foti, governante ne’e subliña.
Jornalista : Antónia Gusmão
Editora : Julia Chatarina
