DILI, 20 outubru 2021 (TATOLI)—Governu liuhosi reuniaun Konsellu Ministru (KM), deside hodi estende tan loron partisipasaun membru Governu iha sensibilizasaun kampaña vasinasaun kombate COVID-19 iha munisípiu sira to’o loron 30 outubru.
Ministru Prezidénsia Konsellu Ministru, Fidelis Manuel Leite Magalhães, konsidera, partisipasaun membru Governu iha komunidade nia le’et hodi esplika importánsia imunizasaun iha ámbitu pandemia durante semana rua ikus hatudu pasu pozitivu, ne’ebé konsege hasa’e taxa partisipasaun iha programa nasionál ne’e, tanba ne’e ezekutivu sira iha hanoin atu intensifika liután.
“Antes ne’e Konsellu Ministru orienta membru Governu sira ba munisípiu to’o de’it loron 23 outubru, maibé fatin balun presiza reforsu liután, liliu munisípiu ne’ebé maka dada-an tebes, tanba ne’e Konsellu ministru estende partisipasaun membru Governu sira ba loron hitu tan, to’o loron 30 outubru,” Ministru Prezidénsia Konsellu Ministru hateten hafoin reuniaun ezekutivu iha Palásiu Governu, kuarta ne’e.
Notísia relevante: PM orienta membru Governu hala’o kampaña vasinasaun iha territóriu nasionál
Kona-ba mekanizmu, sei ajusta liuhosi diskusaun kle’an hosi parte Governu, ba reforsa atividade iha munsípiu.
Durante akompaña direta preokupasaun iha terrenu, membru Governu sira nota katak taxa partisipasaun vasina iha munisípiu balun menus tanba iha abitante balun fiar ho lia falsu, tanba ne’e prezensa membru Governu atu partilla informasaun loloos.
“Situasaun ne’e labele kontinua, tempu badak Governu sei halo desizaun hodi impoin regra, tanba ne’e Prezidénsia Konsellu Ministru no Ministériu Saúde haree opsaun diploma legál ne’ebé presiza, nune’e obrigatoriadade vasina, inklui regra ba aban-bainrua hodi ezije sidadaun sira vasina, tempu oin mai membru Governu sira labá buka ona sidadaun sira, maibé sidadaun sira mak tenke ba buka postu saúde, tanba ne’e maka ita husu ba sidadaun sira lalika tarde ba vasina,” Portavóz Governu subliña.
Bazeia ba dadus sistema saúde, to’o loron 20 outubru, vasina ne’ebé fó ona ba ema elijível ho idade 18 ba leten, ba doze dahuluk hamutuk 520.674 (69%) no doze daruak 335.787 (44,5%)
Munisípiu Covalima doze dahuluk 85% no doze daruak 54,1%, Viqueque doze dahuluk 83,5% no doze daruak 52,8%, Dili doze dahuluk 80,3% no doze daruak 71,8%, Rejiaun Administrativa Espesiál Oú-cusse Ambeno (RAEOA) doze dahuluk 77,9% no doze daruak 47,6%, Baucau doze dahuluk 73,3% no doze daruak 41,4%.
Munisípiu Manufahi doze dahuluk 68,6% no doze daruak 29,9%, Manatuto doze dahuluk 68,2% no doze daruak 32,2%, Aileu doze dahuluk 59,7% no doze daruak 23,8%, Lautém doze dahuluk 58,4% no doze daruak 31,1%, Liquiçá doze dahuluk 54,7% no doze daruak 28%, Bobonaro doze dahuluk 52% no doze daruak 28,9%, Ainaro doze dahuluk 50,3% no doze daruak 19,4%, no ikus liu Ermera doze dahuluk 50% no doze daruak 17,6%.
Jornalista : Antónia Gusmão
Editora : Julia Chatarina
