DILI, 20 outobru 2021 (TATOLI)— Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Majór Jenerál, Domingos Raul ‘Falur Rate Laek’, akompaña hosi Xefe Estadu Maior F-FDTL, Brigadeiru Jenerál Calisto dos Santos Coliati hala’o audensia regular ho Prezidente Repúblika, Francisco Guterres Lú-Olo hodi informa pontu situasaun forsa armada nian.
“Prezidente Repúblika hanesan Komandante Supremu Forsa Armada husu atu F-FDTL kontinua hala’o nia kna’ar tuir lei hodi alkansa objetivu sira ne’ebé define ona,” Majór Jenerál Falur Rate Laek, informa, ba jornalista sira iha Palasiu Prezidente, Bairru-Pité, kuarta ne’e.
Alende ne’e, hato’o mós relatóriu kooperasaun Bilaterál entre Forsa Armanda Timor-Leste no Indonézia atu hakbiit koñesimentu no tatika sira ba membru F-FDTL.
“Ami hato’o relatóriu ba Xefe Estadu kona-ba área treinamentu nian no relata mós enkontru koperasaun bilaterál iha área militár ne’ebé F-FDTL halo ho Forsa Armada Indonézia, hodi tau matan ba área fronteira no kooperasaun treinamentu altilaria no kavalaria ba forsa sira,”
Jornalista : Natalino Costa
Editór : Florencio Miranda Ximenes
