COVALIMA, 21 outubru 2021 (TATOLI)—Xefe Departamentu Promosaun Inkluzaun Sosiál, Anacleto do Nascimento, informa iha fulan outubru ne’e Servisu Munisipál Asaun Sosiál (SMAS) apoiu kaixaun 19 ba família matebian vulnerável iha Covalima.
Notísia Relevante: Servisu Sosiál Covalima apoia kaixaun 82 ba família matebian vulnerável
“Hahú iha loron 01 outubru to’o ohin loron, SMAS apoiu ona kaixaun 19 ba matebian ne’ebé família vulnerável iha postu administrativu hitu (7) iha munisípio Covalima,” Anacleto Do Nascimento hateten ba Agência Tatoli, iha nia knaar fatin, Suai Loro, Covalima. kinta ne’e.
Kritéria atu apoiu kaixaun ba família matebian vulneravel, parte família tenke hato’o pedidu ho foto-kopia kartaun Eleitorál matebian no reprezentante família nomós pedidu hosi xefe suku submeta ba iha SMAS, SMAS mós haruka pedidu ba Kompañia Raius Unipesoal, Lda, atu apoiu kaisaun.
Durante ne’e, SMAS apoiu kaixaun ho medida hosi 60 sentimetru ho nia presu $50.00 to’o $ 70.00 ba adultu sira-ne’ebé mate no medida 120 to’o 140 sentimetru ne’e ho nia presu $170.
Kaixaun hirak ne’e SMAS apoiu barak liu ba matebian família vulneravel iha postu administrativu Suai Vila, postu administrativu Zumalai no postu administrativu seluk mós hetan apoiu maibé la dún barak.
“Iha ami-nia dirasaun ne’e, iha de’it karreta fuuner’ariuu rua (2) maibé atendementu atu transporta mate isin no kaisaun ne’e, SMAS koopera di’ak ho família sira,” nia dehan.
Jornalista : Celestina Teles
Editór : Cancio Ximenes
