DILI, 22 outubru 2021 (TATOLI)—Diretór Ezekutivu Nasionál Compact Development Team Timor-Leste (CDT-TL), Embaixadór Constâncio Pinto, konsidera presiza kontribuisaun hosi parte hotu hodi bele atinje kompromisu Timor-Leste ba meta Objetivu Dezenvolvimentu Sustentável (ODS) 6 kona-ba garante disponibilidade bee-moos no saneamentu ba ema hotu.
“Rekomendasaun hosi parte CDT-TL ba dezenvolvimentu kompaktu iha ámbitu implementasaun programa kompaktu ba meta númeru 6, Governu no populasaun tomak tenke kontribui ba dezenvolvimentu kompaktu ba investimentu ne’e,” Diretór Ezekutivu Nasionál CDT-TL hateten ba Agência TATOLI, iha ninia knaar fatin, Palásiu Governu, sesta ne’e.
Durante ne’e Governu halo kooperasaun ho Millennium Challenge Corporation (MCC), ne’ebé hanesan ajénsia asisténsia externa hosi Estadu Unidu Amérika (EUA), ne’ebé ho karater inovadora no independente hodi ajuda luta kontra pobreza globál.
Ba kooperasaun ne’e, lansa ona CDT-TL iha 25 marsu 2019, hodi dezenvolve programa kompaktu iha Timor-Leste liuhosi identifika setór importante relasiona ho aplikasaun ajenda ODS Nasaun Unida tinan 2030.
ODS iha roteiru hamutuk 17, ne’ebé aliña ho Planu Estratéjiku Dezenvolvimentu (PED) 2011-2030, ne’ebé inklui mós ho kompromisu ODS 6, ne’ebé mensiona ema hotu iha direitu hanesan uza bee-moos no saneamentu.
Ba inisiativa ne’e, MCC fó apoiu finansiamentu hamutuk millaun $200 hodi implementa projetu drenajen no saneamentu iha kapitál Dili, enkuantu hosi parte Timor-Leste investe dezeñu detalladu projetu ho kustu millaun $300.
Notísia relevante: 2021, MCC kontribui fundu millaun $200 implementa projetu drenajen-saneamentu
“Tanba osan ne’ebé ita hetan ba investimentu bee-moos ne’e garante la selu fali, entaun ita hotu kontribui ba prosesu ne’ebé agora iha hela estudu viabilidade, hein katak tinan oin sira ne’e bele asina akordu ho MCCI hodi hahú implementasaun iha tinan 2023, maibé sedu liu tinan 2022. Orsamentu estudu viabilidade implementa programa hamutuk milliaun $200 ba tinan lima nian,” Embaixadór Constâncio Pinto akresenta.
Seidauk atinje di’ak meta ODS 6
Durante ekipa CDT-TL halo akompañamentu Governu Timor-Leste ba implementasaun programa atu atinje ODS 6 kona-ba bee-moos no sanemamentu, nota katak Timor-Leste seidauk konsege atinje meta tanba komunidade iha área urbana no rurál kontinua halerik ba bee-moos.
“Programa Objetivu Dezenvolvimentu Sustentável tinan 2030 ba bee-moos no saneamentu seidauk bele atinje tanba ita haree rasik iha fatin barak komunidade atu asesu bee-moos susar loos, ida-ne’e faktu ida ba ita katak seidauk konsege atinje meta ne’ebé iha,” Diretór Ezekutivu Nasionál CDT-TL tenik.
Nia konsidera bainhira komunidade la asesu bee-moos bele prejudika ema-nia saúde, tanba ne’e nia husu Governu presiza haree kondisaun ho realístiku tanba Timor-Leste seidauk konsege atinje meta defenidu, nune’e presiza kria kondisaun.
“Klaru la’ós fasil, liuliu ita nasaun foun presiza tempu no prosesu naruk, maibé importante mak Governu halo levantamentu ba setór bee-moos atubele haree família hira mak asesu ona ba bee-moos no hira mak seidauk,” nia dehan.
Timor Leste iha oportunidade atinje ODS 6
Maski nune’e, tuir Embaixadór Constâncio Pinto, Timor-Leste iha oportunidade boot atu atinje meta tanba iha programa dezenvolvimentu sira halo kolaborasaun ho parseiru internasionál hanesan Banku Dezenvolvimentu Aziátiku (ADB, sigla inglés), MCC, no ajénsia internasionál seluk hodi haree situasaun bee-moos.
“Governu iha ona akordu ho ADB atu haree bee-moos iha munisípiu Manufahi, Viqueque, Baucau no Dili, enkuantu MCC mak sei investe iha saneamentu no tratamentu bee-moos,” nia dehan.
Aleinde ne’e, Governu liuhosi autoridade responsável kolabora ho parseiru atu kanaliza bee-moos ba rezidénsia abitante ida-idak.
“Komunidade iha difikuldade asesu ba bee-moos iha ne’ebé de’it, tantu iha munisípiu Dili rasik abitante balun sei la’o buka bee ho distánsia dook tanba ita seidauk lori bee ba to’o komunidade,” Constâncio Pinto hateten.
Notísia relevante: BTL,E.P kontinua halo melloramentu sistema bee-moos no saneamentu
Atu atinje meta ODS 2030, ekipa kompaktu dezenvolvimentu nian servisu hamutuk inisialmente ho Governu atu realiza planu MCC, ne’ebé investe iha bee-moos ba ema hotu, nune’e aban bainrua bee-moos bele hemu de’it la presiza atu nono tan.
Maski programa ne’e rasik iha mudansa oituan, bee foer iha munisípiu Dili hosi família 1.100 resin ninia sintina, aban bainrua sei lori hotu ba fatin tratamentu hafoin husik iha tasi.
MCC no Governu Timor-Leste, fó importánsia mós ba moras rakítiku labarik sira no moras ne’ebé afeta ba labarik nia kakutak tanba kondisaun bee la favorável.
“Ita-nia bee iha rai-okos kontaminadu barak tanba dutante tinan atus resin foer sira naklekar iha rai leten no udan tun foer ba iha rai okos, entaun halo kontamina,” nia esklarese.
Aleinde tratamentu bee foer, MCC no Governu iha ona planu sei investe mós iha fábrika ba produsaun kímiku tratamentu bee-moos uza matéria prima hanesan masin iha Dili, Liquiçá, Ermera, Aileu no Manatuto, ne’ebé sei implementa iha munsípiu haat, enkuantu iha Dili ba projetu bee-moos ho tipu hanesan.
Agora iha faze estudu viabilidade atu haree potensialidade matéria prima seluk, ne’ebé kuandu hatudu rezultadu di’ak, iha posibilidade sei implementa produsaun kímiku tratamentu bee-moos iha territóriu tomak.
Jornalista : Arminda Fonseca
Editora : Julia Chatarina
