OÉ-CUSSE, 23 outubru 2021 (TATOLI)—Vise-Prezidente Assosiasaun Futeból Oé-Cusse (AFO), Julio Coel informa, Prezidente Autoridade RAEOA aprova ona kalendáriu ba Copa AFO sub-22, entaun iha domingu (24/10) aban sei hala’o abertura jogu iha kampu futeból Oé-Bau.
Notísia Relevante: Abertura Copa AFO RAEOA sub-22 sei hala’o iha outubru
“Iha sesta (22/10) horisehik, ita halo ona technical meeting no dada-rifa, hamutuk klube-26 mak partisipa iha torneiu Copa AFO RAEOA sub-22 ba tinan 2021 ne’e. Abertura ita sei halo iha aban, domingu lorokraik. Maioria klube sira mai hosi sub-rejiaun haat iha Oé-Cusse mak sei kompete,” Vice Prezidente AFO, Julio Coel, informa ba Agência Tatoli iha Oé-Cusse, sábadu ne’e.
Iha fulan-setembru to’o outubru, ezekutivu AFO diskute kona-ba kalendáriu no tetu mós situasaun pandemia COVID-19 ne’ebé akontese iha Oé-Cusse.
Maibé kazu positivu menus entaun AFO husu autorizasaun iha Autoridade RAEOA liuhosi Prezidente Autoridade no rezultadu kalendáriu aprovadu ona atu realiza iha 24 outubru to’o 26 novembru 2021.
“Copa AFO ne’e torneiu rotativ. Kada tinan, ita realiza nafatin tanba AFO hetan apoiu fundu hosi Federasaun Futeból Timor-Leste (FFTL) no sei realiza nafatin Copa ne’e iha nivél distritál,” nia dehan.
Bainhira Assosiasaun Futeból Oé-Cusse (AFO) eziste iha Oé-Cusse iha 2019, sira hahú organiza atividade kompetisaun futeból nivél sekundáriu, realiza copa referendu ba juventude sira, no iha outubru 2020 mak foin hahú realiza Copa AFO ba sub-22 hanean jogu rotativa.
Kona-ba preparasaun, vice Prezidente ne’e hateten, atualmente preparasaun másimu ona hanesan fatin sei uza kampu futeból Oé-Bau, ekipamentu ba arbitrajén inklui premiu ba manan-na’in sira.
Aleinde ne’e, ezekutivu AFO aprova ona regulamentu Copa AFO nian tuir regulamentu ne’ebé mak Federasaun Futeból Timor-Leste (FFTL) aplika ona iha nasaun Timor-leste nomós kona-ba sansaun kartaun kinur, mean inklui dixiplina iha jogu laran.
Atu halo prevesaun ba dezastre no apoiu seguransa iha Copa AFO sub-22 ne’e, daudaun ne’e ekipa AFO distribui ona karta konvite ba parte seguransa PNTL-FDTL, ambulansia no Kruz Vermella Timor-Leste filiál Oé-Cusse mak sei halo atuasaun durante torneu ba Copa AFO sub-22 ne’e realiza.
Iha abertura ne’e, arbitru Candido da Costa Tefa sei lidera jogu abertura entre FC Febuki kontra FC Suni-Ufe, ne’ebé akompañadu hosi asisténsia arbitru (lainha) na’in-rua (2), Amandio Dias no Rodrigo Teixeira, ne’ebé sei hala’o iha tuku 16h00 lorokraik.
Jornalista : Abílio Elo Nini
Editór : Cancio Ximenes
