VIQUEQUE, 24 outubru 2021 (TATOLI)— Polísia Nasionál Timor-Leste (PNTL) munisípiu Viqueque, husu Governu monta sinál tránzitu iha munisípiu refere nune’e fásil ba sinaleiru sira kontrola movimentasaun transporte públiku.
“Sinál tránzitu (seidauk iha) sai ami-nia preokupasaun, ida-ne’e hosi diresaun nasionál transporte maka haree. Ho preokupasaun ne’e ami hato’o ona ba diresaun nasionál transporte terrestre, maibé seidauk tau atensaun,” Komandante Tránzitu Munisípiu Viqueque, Sarjentu Xefe Polísia, Venceslau Moreira de Oliveira Freitas informa ba Agência TATOLI, iha kna’ar-fatin, Viqueque, domingu ne’e.
Nia dehan, sinaleiru (polísia tránzitu) ezekuta lei no orden ba sidadaun ne’ebé kontra regra sinál nune’e ema hotu kumpri lei rodaviáriu maibé laiha sinál tránzitu entaun defísil tebes.
“Ami mós tenta hela atu oinsá tau sinál ba fatin sira-ne’ebé perigu ba ema-nia vida, maibé governu maki ha kompeténsia” nia katak.
Purtantu, Diretór Servisu Transporte Terrestre (DTT) Munisípiu Viqueque, Elvino da Cruz, haktuir, sinál tránzitu ne’e bele propoin maibé ministériu maka foti desizaun.
“Ita planeia atu monta sinál iha munisípiu ne’e, ita só propoin ba ministru foin tau sinál no tau sinál mós ita tenke liuhusi peskiza ba estrada sira iha Viqueque,” Elevino informa.
Nia haktuir, planu ne’e dezde 2013 maibé labele realiza tanba liga mós ba kestaun orsamentu, tan ne’e mak to’o agora agora seidauk hala’o.
Tuir observasaun jornalista Agência TATOLI iha munisípiu Viqueque, katak daudaun ne’e seidauk iha sinál tránzitu ruma hodi kontrola movimentasaun transporte públiku.
Jornalista : Vitorino Lopes da Costa
Editór : Evaristo Soares Martins
