VIQUEQUE, 24 outubru 2021 (TATOLI) — Konstrusaun Uma Kbiit Laek (UKL) iha suku Ossu de Cima, postu adiministrativu Ossu, munisípiu Viqueque foin atinje ba 30% tanba impaktu hosi udan.
“Konstrusaun Uma Kbiit Laek agora daudaun la’o hela, fízikamente foin atinje 30%. Obstákulu maka mudansa klimátika iha tinan ida-ne’e, tanba rai udan hela de’it no tama fulan-outubru udan foin para,” Xefe suku Ossu de Cima, Celestino Monteiro de Gama, ko’alia iha suku Ossu de Cima, domingu ne’e.
Celestino hatutan, mudansa klima difikulta ekipa Planu Nasionál Dezenvolvimentu Suku (PNDS) orienta fornesedór hatama materiál konstrusaun tanba ne’e mak persenteajen ki’ik ne’e.
“Maibé tama ba fulan-novembru, ha’u fiar katak benifisiáriu sira haree ona ninia uma ne’ebé governu konstrui,” Xefe suku Ossu de Cima ne’e hateten.
Konstrusaun UKL iha suku Ossu de Cima monu iha aldeia Bakasi ba benifísiariu na’in-tolu maka hanesan Cipriano, Luciana no Irene.
Enkuantu konstrusaun UKL iha suku Builo, postu adiministrativu Ossu, munisípiu Viqueque oras ne’e foin mak sosa materiál konstrusaun.
“Suku Builo uma UKL monu iha aldeia Buareka, konstrusaun ne’e ekipa suku no akompaña hosi ekipa PNDS sei direta ba sosa, ne’ebé segunda no tersa ami foin enkontru hodi ba sosa direta materiál kontrusaun,” Xefe suku Builo, Osório da Silva informa.
Nia dehan, konstrusaun UKL iha suku Builo tarde tanba impaktu husi klima ne’ebé akontese iha tinan ne’e.
“Iha ha’u-nia suku ne’e, iha fulan kotuk ke’e ona fundasaun, maibé ho klíma la permite tanba ne’e maka konstrusaun atraza ne’e,” Osório haktuir.
Jornalista : Vitorino Lopes da Costa
Editór : Evaristo Soares Martins
