COVALIMA, 25 outubru 2021 (TATOLI)—Servisu Munisipál Potesaun Sivil Dezastre Naturál (SMPSDN) selebra loron mundiál Redusaun Risku Dezastre Naturál ho programa kuda ai-oan iha postu administrativu Maucatar, munisípiu Covalima.
Diretór Servisu Munisipal Protesaun Sivil Jestaun Dezastre Naturál, Quintino da Costa, hateten iha selebrasaun ne’e, autoridade munsipál hamutuk ho komunidade kuda Ai-Kakeu no Samtuku hamutuk hun 75, ho objetivu hodi hametin rai ne’ebé halai atu labele fó impaktu ba madre sira-nia rezidénsia no dormitoriu.
“Ohin, ita selebra loron mundiál Redusauun Risku Dezastre Naturál iha munisipiu Covalima mak ita realiza kuda ai-oan iha postu Maucatar. Maibé loloos, loron mundiál ne’e monu iha 13 outubru maibé ita foin selebra tanba laiha finanseira,” Quintino da Costa hateten ba jornalista sira iha postu administrativu Maucatar, segunda ne’e.
SMPSDN realiza atividade kuda ai-oan ne’e hetan apoiu finanseira hosi Mercy Corps ho CVTL Filiál Covalima hamutuk $.600
“Fundu $600 ne’e hetan apoiu hosi ONG Mercy $500 no Crus Vermelha Timor-Leste Covalima $100, hodi selebra loron mundiál ne’e,” nia dehan.
Diretòr Agrikultór Munisípiu Covalima, Zeferino reforsa ai-oan ne’ebè mak ohin kuda ne’e, prepara no oferese hosi Servisu Agrikultor Munisipiu Covalima liuhosi Departamentu Floresta no iha futuru sei fó apoiu tan viveiru komunitáriu hodi nune’e bele kuda iha fatin ne’ebè mak risku ba dezastre naturál.
“Ohin kuda ai-oan ne’e atu prevene rai halai. Tanba ne’e, bainhira udan monu rai, ita sei koloka tan ai-oan mai iha ne’e hodi kuda iha fatin risku ne’ebé rai sei mamuk hela,” Zeferino informa.
Administradór Munisípiu Covalima, Francisco de Andrade, hateten komunidade, madre no estudante sira tenke kuidadu ai-oan sira-ne’ebè ekipa kuda, atu bele hametin rai ne’ebé halai hodi nune’e iha futuru mai rai labele halai tan
“Ha’u husu ba imi hotu tenke kuidadu ai ne’ebé mak ohin ita kuda ne’e, nune’e oinsá mak bele hametin fali rai halai. Se imi mak la kuidadu entaun hanesan de’it. Ha’u agradese ba madre sira tanba akontese hanesan hato’o lalais,” nia dehan.
Iha atividade kuda ai-oan ne’e partisipa hosi Administradór Munisípiu Covalima, Diretòr Solidariedade Sosiál Inkluzaun Covalima, Koordenadór CVTL Covalima, Reprezentante ONG Mercy Corps, Diretòr Seguransa ba Ai-han, madre sira no estudante sira ne’ebé hela iha madre sira-nia rezidénsia ne’e.
Notísia Relevante: Covalima selebra loron mundiál Risku Dezastre ho kuda ai-oan
Jornalista : Celestina Teles
Editór : Cancio Ximenes
