DILI, 25 outubru 2021 (TATOLI)–Ministériu Edukasaun Juventude no Desportu (MEJD) halo ona re-verifikasaun dadus profesór atu identifika númeru profesór permanente, kontratadu no voluntáriu hodi monta tuir númeru estudante iha tinan 2022.
“Ha’u simu ona informasaun, iha eskola balun profesór ida hanorin estudante la to’o na’in-10, maibé iha eskola balun profesór ida hanorin alunu besik 70, ida-ne’e maka ita halo re-verifikasaun dadus atu hatene didi’ak númeru profesór kontratadu voluntáriu no permanente iha territóriu nasionál,” dehan Ministru Edukasaun Juventude no Desportu, Armindo Maia, hateten iha Otél JL Villa, Fatuhada, segunda ne’e
Aleinde ne’e, presiza halo re-verifikasaun dadus profesór tanba Governu planeia loke vaga ba profesór hamutuk 975, tanba ne’e MEJD hakarak identifika uluk eskola sira ne’ebé menus profesór, nune’e bainhira prosesu rekrutamentu finaliza ona bele monta.
Notísia relevante: 2021, MEJD rekruta profesór 975
“Ita hakarak halo distribuisaun di’ak iha futuru, se lae futuru mai ita monta arbiru de’it, ita haruka tan ba eskola ne’ebé laiha profesór,” nia akresenta.
Planu ne’e hetan reasaun hosi Parlamentu Nasionál, ne’ebé Deputadu sira husu MEJD esplika kona-ba prosesu rekrutamentu.
“Xefe Governu parese simu ona karta hosi Parlamentu, maibé terminasaun bainhira atu bá halo esplikasaun seidauk klaru tanba fulan ida-ne’e besik ramata, espera novembru ba oin,” nia dehan.
Jornalista : Tomé Amado
Editora : Julia Chatarina
