VIQUEQUE, 25 outubru 2021 (TATOLI)–Provedoria Direitu Umanu no Justisa (PDHJ, sigla portugés) fó formasaun ba membru Polísia Nasionál Timor-Leste (PNTL) Viqueque hodi hasa’e koñesimentu ho tema ‘hala’o knaar tenke ho respeitu no proteje diretu umanu’.
Formasaun realiza hahú segunda to’o sesta ne’e, ne’ebé daudaun formasaun ba Komadante Eskuadra postu lima Viqueque, hamutuk na’in-23.
Tuir Provedora PDHJ, Jesuina Maria Ferreira, formasaun ne’e realiza tanba kooperasaun ho asesoria direitu umanu Nasaun Unida no sentru formasaun PNTL, ne’ebé halo ona akordu iha tinan 2014 ba formasaun membru Polísia.
“PDHJ nian parte fó formasaun direitu umanu, ne’ebé ita espera formasaun durante loron lima ne’e ita-boot sira (membru Polísia) bele uza oportunidade ho didi’ak simu matéria,” Prevodoria PDHJ hateten ba Agência TATOLI, iha sentru formasaun PNTL, Viqueque, segunda ne’e.
Tipu formasaun oioin hanesan jenérika, jerál no espesializada hosi parseiru sira seluk.
Iha tinan 2019, PDHJ no PNTL asina akordu kontinua fó formasaun ba membru PNTL sira, ne’ebé Polísia ne’ebé hetan ona formasaun to’o agora hamutuk 481 (10%) hosi totál 4.440.
“Ami hosi PDHJ hakarak fó formasaun ba membru hotu. Komandu enkoraja nafatin membru feto hodi partisipa formasaun tanba partisipasaun feto kiik liu,” nia akresenta.
Iha tinan kotuk, Provedoria halo revisaun manuál formasaun ne’ebé realiza ona tinan 2014 tanba identifika lakuna balun no alterasaun balun iha enkudramentu nasionál no internasionál.
“Iha semana kotuk, ami lansa fali revizaun manuál formasaun diretu umanu ba PNTL, ne’ebé iha módulu haat no agora aumenta tan modulu rua sai neen, ne’ebé módulu ida kona-ba Estadu sesaun no polísiamentu sein diskriminasaun,” nia tenik.
Nune’e, bazeia ba revisaun manuál foin implementa formasaun iha Lautém no Viqueque.
“Agradese ba oportunidade ne’e, atu fó hatene ba ita-boot sira katak formasaun ne’e direitu membru sira, dala barak membru sira kontente bainhira laiha formasaun, maibé kuandu formasaun laiha ita-boot lakon boot. Tuir loloos lahetan formasaun tenki eziji ba Komadante sira hodi hetan formasaun,” nia fó hanoin.
Iha fatin hanesan, Komadante PNTL munisípiu Viqueque, Sebestião Alves Quintão, agradese ba inisiativa ne’e tanba bele ajuda membru sira iha asaun.
“Agradese ba PDHJ mai fó formasaun ba membru PNTL, tanba PDHJ iha dalan barak halo intervensaun ba institusaun ne’ebé kontra direitu umanu, ne’ebé laiha kbiit halo keixa ba autoridade Polísia, maibé PDHJ iha obrigasaun atu buka halo rekomendasaun ba instituisaun,” nia tenik.
Jornalista : Vitorino Lopes da Costa
Editora : Julia Chatarina
