DILI, 25 outubru 2021 (TATOLI)—Sekretaria Estadu Komunikasaun Sosiál (SEKOMS) halo survey ba dahuluk kona-ba persepsaun públiku ba mídia estatál no privada iha territóriu tomak tanba durante tinan barak nia laran seidauk halo peskiza ruma.
Tuir Tékniku Profisionál Peskiza Análiza Mídia SEKOMS, Carsiliano Oliveira, Governu hakarak hatene no sukat preferénsia públiku kona-ba asesu informasaun (asuntu) ho persentajen boot liu hatudu katak tópiku polítika nasionál 33%, ekonomia no negósiu 20%, informasaun munisípiu no edukasaun sosiál 14%, no tópiku seluk hanesan sosiu kulturál no tópiku insternasionál no seluk 8-1%.
“Ne’e signifika, maioria povu Timor-Leste prefere liu akompañia notísia polítika nasionál kompara ho notísia seluk, no rezultadu survey hatudu katak divulgasaun informasaun ho tópiku sira ne’e, públiku prefere liu akompaña liuhosi mídia estatál no GMN-TV ho persentajen signifikante tebes, ne’ebé ba Rádiu Televizaun Timor-Leste, Empreza Públika (RTTL, E.P) 56-60%, E.P no GMN-TV 36-39%, televizaun privadu sira seluk 2-1%, ne’ebé hatudu katak kompetisaun laiha,” Tékniku Profisionál SEKOMS hateten liuhosi komferénsia imprensa iha Palásiu Governu, segunda ne’e.
Iha inisiativa ne’e, envolve partisipante ne’ebé klasifika tuir sexu, idade, profisaun no nível edukasaun hosi ema hamutuk 1.002, ne’ebé kompostu hosi feto 450 (45%) no mane 552 (55%), ne’ebé hanesan funsionáriu públiku 313, autoridade lokál 24, emprezáriu no negosianye 70, estudante 478 no agrikultór 117, ho nível edukasaun la eskola 13, pre-sekundária 109, sekundária 591, lisensiatura 235 no mestradu 54.
Atividade ne’e ho objetivu atu sukat asesu no fiar hosi komunidade, liuliu ba mídia estatál hanesan RTTL, E.P, TATOLI-Agência Noticiosa de Timor-Leste, Institutu Públiku (Agência TATOLI, I.P), no Rádiu Komunidade 16 ne’ebé hetan fundu hosi orsamentu Estadu.
“Rezultadu survey nasionál ida-ne’e indika katak ein termu televizaun, Rádiu Televizaun Timor-Leste hetan fiar liu hosi publiku (70%), tuir mai GMN-TV (24%),Televizaun Maubere, STL-TV,TVE no Guardamor-TV hetan (5%-1%) ne’ebé laiha signifikasaun kompara TVTL no GMN-TV,” nia akresenta.
Nune’e, tuir Tékniku Profisionál SEKOMS, levantamentu ne’e hodi fó inspirasaun di’ak ba mídia sira atubele haboot liután informasaun ba públiku liuhosi programa ka atividade ne’ebé mídia sira fornese.
SEKOMS husu mídia divulga informasaun saudável no kredível
Iha biban hanesan, Sekretáriu Estadu Komunikasaun Sosiál, Merício Juvinal dos Reis ‘Akara’, hateten, atividade ne’e fasilita públiku bele hatene persentajen konsumu informasaun hosi mídia estatál no mídia privada.
“Nune’e, Governu bele apoia mídia sira hotu ne’ebé eziste iha rai-laran hodi divulga informasaun ne’ebé saudável, kredível no loloos ba iha komunidade iha rai-laran no iha estranjeiru,” nia dehan.
Liuhosi rezultadu peskiza, SEKOMS husu ba instituisaun mídia sira atu fornese informasaun ne’ebé klaru no justu ba komunidade, nune’e bele aumenta persentajen asesu iha futuru.
“Mídia mak sai hanesan liman-ain Estadu no ema hotu hodi publika espresaun populasaun, atividade no talentu servisu hotu ne’ebé ita hala’o loron-loron, liu-liu iha atividade Governu, ba dezenvolvimentu Estadu no rai ne’e,” governante ne’e subliña.
Nia rekoñese, maski atividade ne’e seidauk másimu, maibé iha informasaun sufisiente hodi fornese ba públiku atu garante informasaun hotu ne’ebé mídia sira fornese, nune’e ba oin SEKOMS nafatin serbisu hamutuk ho mídia atu garante kualidade informasaun di’ak liu ba públiku.
Identifika plataforma ne’ebé públiku asesu no fiar liu
Survey ne’e hakarak buka hatene oinsá públiku nia asesu no fiar ba plataforma mídia konvensionál hanesan, televizaun, rádiu no jornál sira kompara rede sosíal hanesan Facebook, Instagram, Youtube no seluk tan.
Hatudu katak plataforma informasaun ne’ebé públiku fiar liu maka televizaun 67%, rádiu 21%, jornál 5%, mídia online 4%, rede sosiál 3%, no opsaun seluk 2%.
Públiku prefere liu asesu informasaun liuhosi fontes online hanesan website ofisiál 37%, Youtube 31%, Facebook 22%, Instagram 8%, Tweeter 1% WhatApp 1%, no seluk 0,12%.
Rezultadu mós hatudu, fontes informasaun ne’ebé públiku uza ba atividade loron-loron maka mídia online 28%, rede sosiál 26%, televizaun 26%, rádiu 15%, jornál 4% no opsaun seluk 1%.
Hatudu mós katak, kanál mídia online ne’ebé asesu barak liu maka Agência TATOLI 38%, Tempo Timor 25%, STL 23%, GMN-TV 16%, Timor Post 6%, RTTL, E.P 3%, opsaun seluk 3%.
Nune’e, GMN-TV hetan fiar hosi públiku 24%, Televizaun Maubere, Televizaun Suara Timor-Lorosa’e (STL-TV), Televizaun Edukasaun Guarda-TV hetan fiar 5%-1%.
Rezultadu survey ne’e mós hatudu katak RTTL, E.P sai preferénsia di’ak liu 54% ba públiku, tuir fali mak Rádiu Komunidade 34%, Rádiu GMN, Maubere no Rádiu Liberdade no RTK, ne’ebé hetan fira menus liu 4%-1%, ne’ebé laiha signifikante atu kompete ho rádiu estatál no Ráriu Komunidade.
“Públiku ninia preferénsia hodi asesu ba jornál boot liu maka Diáriu Nasionál 39%, Timor Post 34%, STL 8%, Jornál Indepedente 7% no Bussiness Timor 4%,” nia dehan.
Jornalista : Arminda Fonseca
Editora : Julia Chatarina
