COVALIMA, 26 outubru 2021 (TATOLI)—Administradór Munisípiu Covalima (AMC), Francisco de Andrade, distribui motorizada ho marka Verza hamutuk 14 ba karg xefia sira hanesan xefe departamentu sira hosi postu administrativu hitu (7) iha munisípiu Covalima.
“Ohin, ita entrega motorizada ba xefi sesaun sira iha postu administrativu hitu (7), motorizada 14 hodi fasilita xefe departamentuu sira hala’o servisu iha terreñu,” Administradór Francisco de Andrade hateten ba jornalista sira iha administrasaun Covalima, tersa ne’e.
Francisco husu ba xefe departamentu sira uza motor hodi hala’o servisu la’ós uza ba servisu privadu nian, tanba bazea ba esperiénsia hatudu katak ema sira-ne’ebè simu motor hosi Estadu laiha sentimentu hodi uza motorizada estadu nian no laiha responsabilidade.
“Ha’u husu sira-nia konpreensaun, uza motor tenke ho kuidadu. Estadu hanoin ita-boot sira atu fasilita ita-boot sira-nia servisu,” nia dehan.
Motorizada ne’e sosa uza orsamentu hosi administrasaun munisípiu Covalima no motor ida ho nia folin $1,750.
“Kampañia sosa motor ne’e liuhosi prosesu konkursu. Ha’u mós haluha ona kompañia nia naran tanba kompañia hosi nasionál no iha momentu pandemia COVID-19, ita defisil atu ezekutam,” nia dehan.
Jornalista : Celestina Teles
Editór : Cancio Ximenes
