DILI, 26 outubru 2021 (TATOLI)–Ekipa konjunta kompostu hosi Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés), Servisu Notariadu no Ministériu Negósiu Estranjeiru no Kooperasaun (MNEK) planeia halo atendimentu movel ba timor-oan sira iha Inglatera.
Atendimentu móvel sei halo ba sidadaun ne’ebé presiza atualiza kartaun eleitorál, halo foun kartaun, renova pasaporte ka halo foun pasaporte no dokumentu seluk.
Tuir Diretór Jerál STAE, Acilino Manuel Branco, atividade resensiamentu eleitorál, atualiza baze dadus STAE no servisu seluk ba sidadaun sira iha diáspora hala’o ona iha loron 01 outubru 2021 no sei ramata iha loron 14 janeiru 2022, ne’ebé durante ne’e atividade realiza iha Korea Súl, Portugal no Inglatera, nasaun rua la mosu problema no ekipa tékniku sira la hasoru difikuldade maibé mosu fallansu tékniku balun iha Inglatera.
“Atu solusiona problema ne’e, ekipa konjunta eleitorál sei haree atu reforsa rekursu no ekipamentu, tanba Governu aprova ona atendimentu móvel ba Irlanda Norte no fatin sira seluk. Ami haree hela pelu menus iha fulan-ida mai bele halo atendimentu móvel iha fatin sira ne’ebé aprova ona liuhosi Rezolusaun Governu,” Diretór Jerál STAE hateten ba Agência TATOLI, iha ninia knaar fatin, Caicoli, tersa ne’e.
Notísia relevante: Dadus provizóriu: STAE rejista eleitór 855.630 hosi janeiru-outubru 2021
Ekipa sira la hasoru difikuldade iha rai-li’ur, liuliu iha Koreia Súl tanba ekipa STAE halo kolaborasaun serbisu notariadu, ne’ebé fasilita tebes lori apoia ba resensiamentu rasik.
“STAE nia alvu klaru tanba atendimentu ne’ebé halo, ezemplu haree ba dadus iha ema barak halo atualizasaun, tanba traballadór timor-oan ne’ebé serbisu iha rai-li’ur kaer eleitorál Timór no aban-bainrua hakarak ezerse direitu votu, tenke ajusta ho atualizasaun kartaun. Aleinde ne’e, iha Portugal laiha problema tanba númeru timor-oan maski seidauk identifika maibé ladún boot, ne’ebé tékniku sira la relata informasaun ruma katak mosu problema téknika,” nia dehan.
Enkuantu, iha Londres, tanba iha ne’ebá númeru timor-oan barak kompara ho nasaun seluk, maibé ho koordenasaun ekipa, tenta atu fó resposta ba preokupasaun hosi sidadaun.
Bazeia ba informasaun ne’ebé hetan no públiku asesu liuhosi rede sosiál, iha sidadaun timor-oan barak maka hakarak halo renovasaun dokumentu, nune’e sira foin emite dokumentu foun hanesan billete identidade, sertidaun RDTL no pasaporte.
“Ida-ne’e ami haree hosi númeru no informasaun ne’ebé asesu hosi servisu notariadu, katak iha partisipasaun boot tebes. Hosi parte atendimentu kartaun eleitorál, iha partisipasaun boot maibé atendimentu foin tama fulan-ida, ne’ebé planeia ba fulan-rua ho balun, pelu menus to’o loron 14 jeneiru ha’u fiar katak sei kobre ba ita-nia sidadaun iha rai ne’ebá,” nia haktuir.
Iha problema téniku balun mak akontese iha Inglatera, tanba haree atendimentu ne’e asegura iha embaixada iha ema-nia rain, entaun dala ruma espasu ladún sufisiente atu akomoda sidadaun sira.
“Sistema ne’ebé utiliza hosi STAE, serbisu notariadu ne’e integradu no tenke ho eletrisidade inklui internet. Dala ruma iha ema-nia rain eletrisidade no internet di’ak, maibé dala ruma akontese fallansu téniku, entaun difikulta oituan atendimentu,” Responsável ne’e klarifika.
Jornalista : Antónia Gusmão
Editora : Julia Chatarina
