COVALIMA, 26 outubru 2021 (TATOLI)—Country Manager Timor Resources, Filomeno Andrade informa, Kompañia Timor Resources Pty.Ltd promete sei emprega Covalima-oan 97% iha planu esplorasaun mina.
Notísia Relevante: ANPM aprova dokumentu “Safety Case”, Kompañia Timor Resources hala’o perfurasaun
“Iha prosesu ida-ne’e ami halo atividade ne’ebè hala’o iha Covalima, Timor Resources sei emprega 97% timor-oan, iha Same sei emprega 98% timor-oan,” Country Manager Timor Resources Filomino Andrade hateten liuhosi konferénsia imprensa, iha Aeroportu Internasionál Kay Rala Xanana Gusmão, Covalima, segunda ne’e
Prosesu rekrutamentu, nia dehan, Kompañia Timor Resources sei klarifika hodi haree ba skill, sem skills, an skill no okazionál ne’ebè sei liuhosi teste.
“Klarifika kategoria skills no sem skills ne’e tenke haree ema iha esperiénsia atividade perfurasaun mina, tanba iha risku no ezijénsia barak tanba ita mós hakarak atu hetan rezultadu di’ak. Ita tenke buka oinsá iha kapasidade tékniku atu hetan rezultadu di’ak,” nia hateten.
Nune’e mós, rekrutamentu an skill ho okazional emprega trabaldór liuhosi líder komunitáriu maske mosu lamentasaun barak, maibé kompañia esforsu emprega trabaldór tenke haree ba programa no orsamentu.
Prosesu rekrutamentu ba empregadu an skill ho okazional ne’e Kompañia Timor Resource halo distribuisaun tuir kada suku hamutuk ema na’in-90 iha Covalima hosi suku 30 ho aldeia 148 ne’e, dalaruma sei mosu problema.
“Ita husu ema na’in-lima (5) iha suku ida maibè suku ne’e iha aldeia neen (6) ka hotu (7), ida-ne’e ema hotu labele hetan entaun tenke liuhosi teste, Iha teste ne’e, ita haree ba sira-nia kapasidade atu hala’o servisu maibé importante liu haree ba saúde,” nia dehan.
Tanba, tuir nia, Kompañia Timor Resources labele rezolve kona-ba dezempregu maibé kompañia fó oportunidade ba ema lokál sira atu hetan servisu.
Sidadaun sira-ne’ebè mak atu servisu ne’e tenke prepara an la’ós haree ba intelektuál de’it maibé tenke iha saúde ne’ebè di’ak.
“Ita realiza atividade iha Covalima no iha Manufahi, atividade iha ligasaun ba malu. Kompañia tenke asegura bainhara asegura uluk iha Covalima maibé ba Manufahi mós tenke iha kontinuidade,” nia dehan.
Tanba ne’e, nia hateten, kompañia sei aplika politika 75% ba ema Covalima-oan sira 25% no hosi Manufahi atu bele asegura kontinuidade kuandu ba halo iha Manufahi hamutuk 75%, hosi Covalima 25% no agora iha perfurasaun maiória Covalima-oan.
“Oras ne’e daudaun kuzineiru na’in-12. Hosi númeru ne’e na’in-10 hosi Covalima no na’in-rua (2) hosi Manufahi, tanba bazea ba skill iha Covalima ne’e ema laiha,” nia hateten,
Jornalista : Celestina Teles
Editór : Cancio Ximenes
