AILEU, 25 outubru 2021(TATOLI)-Bainhira númeru Covid-19 kontinua sa’e maka’as iha Timor-Leste no halakon mós vida sidadaun sira nian, Oitavu Governu Konstitusionál halo esforsu oioin hodi kombate propagasaun vírus ne’e. Tanba ne’e, Governu liuhusi desizaun Konsellu-ministru deside membru governu sira tuun direta ba baze hamutuk ho komunidade iha suku no aldeia sira hodi halo sensibilizasaun informasaun kona-ba vasina atu bele mitiga no kombate surtu Covid-19 iha territóriu Timor-Leste. Ministériu Asuntu Parlamentár no Komunikasaun Sosiál (MAPKOMS), Sekretáriu Estadu Terra no Propriedade (SETP), Sekretáriu Estadu Arte no Kultura (SEAK) hamutuk ho administradór munisípiu Aileu no adiministrador postu haat iha munisípiu Aileu hamutuk ho autoridade Ministériu Saúde (MS) nasionál no munisipál hala’o avaliasaun ba kampaña nasionál Covid-19 iha munisípiu Aileu. Objetivu husi avaliasaun ne’e mak atu avalia rezultadu serbisu kona-ba kampaña vasinasaun hodi nune’e bele haree fila fali métodu ne’ebé uza durante ne’e no oinsá planu ba étapa ikus extensaun ba kampaña nasionál, hodi bele to’oo iha alvu ne’ebé atu atinji maka 80%.
Produsaun Tatoli I.P @2021
