BAUCAU, 27 outubru 2021 (TATOLI) – Governu liuhosi Ministériu Obra Públika (MOP) fó-sai katak konstrusaun ba estrada diresaun postu administrativu Laga ba Baguia sei loke konkursu iha fulan-novembru no sei hahú konstrusaun iha 2022.
Diretór Jerál Administrasaun Finansa MOP, Januário Barbosa hateten, orsamentu tinan 2021 atu halo reabilitasaun estrada Laga-Baguia ne’e aprovadu, maibé dezeñu tarde tanba Covid-19 no foin finaliza.
Nune’e, hein Ajénsia Dezenvolvimentu Nasionál verifika no aprova antes loke tenderizasaun ne’ebé tuir alvu sei anunsia iha fulan-novembru maibé bainhira tarde sei loke iha tinan 2022.
“Orsamentu millaun $70-resin ba pakote sira hotu, ba reabilitasaun kuaze millaun $2, ami garante tanba orsamentu aprova iha 2021 no ita reapropria fali iha 2022,” Diretór Jeral Admistrasaun Finansa MOP ne’e ko’alia iha sede suku Uakala, Baguia, kuarta ne’e.
Estrada Laga-Baguia ho kilómetru 30 ne’ebé sei konstrui mós ponte Samalari, enkuantu kilómteru 37 hosi Baguia, Bahatata to’o Uatucarbau, munisípiu Viqueque.
Nune’e mós estrada rúral hosi postu Baguia diresaun suku Haekoni, Ossouna, Afaloicai to’o Afaloicai, Outucarbau munisípiu Viqueque ho kilómteru 37.
Tinan-ne’e ligasaun estrada entre suku Afaloicai, Baguia ba aldeia Buibela no direta ba Uatulari ne’ebé envolve ponte Sana. Purtantu loke mós estrada hosi Uaiaka, Quelicai no Ossu, munisípiu Viqueque.
“Projetu iha área Baucau no Viqueque kuaze pakote 14 ne’ebé planu realiza iha tinan 2021 maibé tanba situasaun pandemia COVID-19 nune’e sei realiza iha 2022, orsamentu ami reapropria no aprova ona iha Komité Revizaun Orsamentu nível Polítika (KROP) no sei halo apresiasaun iha Parlamentu Nasionál,” Januário akresenta.
Administradór postu Baguia, António Ramos, hateten, komunidade Baguia no Laga nafatin hein reabilitasaun estrada nune’e bele fasilita movimentasaun komunidade lori produtu lokál ba merkadu.
“Ami hein dezde iha tinan 2017 to’o agora maibé povu Baguia no Laga ninia esperansa hakarak estrada ne’e implementa lalais nune’e komunidade lori produtu lokál ba merkadu ho fásil,” António Ramos hateten.
Jornalista : Natalino Belo
Editór : Evaristo Soares Martins
