iklan

NASIONÁL, HEADLINE, LEI

Governu kria instrumentu planeamentu territoriál

Governu kria instrumentu planeamentu territoriál

Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos, prezide reuniaun Konsellu Ministru. Iha Palásiu Governu, kuarta (27/10). Imajen TATOLI/Francisco Sony

DILI 27 outubru 2021 (TATOLI)—Governu liuhosi reuniaun Konsellu Ministru (KM) ordinária iha kuarta ne’e, aprova Projetu Dekretu-Lei kona-ba Instrumentu Planeamentu Territoriál, ne’ebé aprezenta hosi Vise-Primeiru-Ministru no Ministru Planu no Ordenamentu, José Maria dos Reis.

“Dekretu-Lei ne’e dezenvolve hosi Lei númeru 6/2017, loron 19 abril, kona-ba Lei Baze Ordenamentu Territóriu,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuiaun ezekutivu iha Palásiu Governu.

Lejizlasaun ne’e estabelese rejime jurídiku hosi instrumentu planeamentu territoriál, ne’ebé define rejime koordenasaun iha ámbitu nasionál no munisipál hosi sistema jestaun teritoriál no rejime aprovasaun, ezekusaun no avaliasaun instrumentu jestaun territoriál nian.

Notísia relevante: 2021, MPO prioritiza planu nasionál ordenamentu territoriál

Aprovasaun Lei Baze Ordenamentu Territóriu ho objetivu atu tradús prinsípiu no norma oioin iha Lei-Inan, ne’ebé orienta polítika públika no, konstitui hanesan diretriz loloos ne’ebé tenke halulik iha lejizlasaun ordinária.

Haree ba objetivu Estadu, Lei-Inan estabelese objetivu fundamentál ba polítika públika ordenamentu territóriu ba promosaun no dezenvolvimentu ho armónia no integradu ba setór no rejiaun sira, nune’e fahe produtu nasionál ho justu.

Aleinde ne’e, objetivu seluk ne’ebé Estadu kompromete maka konvoka medida reperkusaun territoriál lubun ne’ebé la bele neglijensia hosi planu territóriu nian, hanesan kazu sira kona-ba garantia dezenvolvimentu ekonomia, kriasaun ben-estar materiál sidadaun, protesaun ambiente no rekursu naturál, no afirmasaun no valorizasaun ba patrimóniu kultura nian, ne’ebé sai hanesan interese públiku ho espresaun territóriu nian ne’ebé tenke hanoin iha definisaun baze jerál ba planeamentu territóriu.

Nune’e, aprovasaun Lei Baze Ordenamentu Territóriu permite atu define ho espesífiku finalidade no prinsípiu orientadór sira Administrasaun Públika, iha definisaun polítika ordenamentu territóriu, identifikasaun interese públika oioin kona-ba territóriu, utilizasaun instrumentu planeamentu territóriu hanesan meiu intervensaun Administrasaun Públika, nune’e mós difini tipolojia no objetivu hirak-ne’ebé tenke obedese.

Lei Baze ne’e prevee ezisténsia tipu rua instrumentu planeamentu territóriu iha ámbitu nasionál no ámbitu munisípiu, ne’ebé dahuluk tenke iha forma nu’udar Planu Naionál Ordenamentu Territóriu no bele komplementa ho planu setorál sira ho ámbitu nasionál, ba polítika públika ida-ida ne’ebé Administrasaun Públika haree katak konveniente no daruak, ámbitu munisípiu, abranje sirkunskrisaun autártika, ne’ebé órgaun desentralizadu sira administrasaun nian maka nu’udar responsavel ba elabora planu munisípiu nian ba ordenamentu territóriu, bainhira presiza, bele elabora no aprova planu sira kona-ba uzu solu.

Ikusliu, Lei ida-ne’e mai objetivu atu enkuadra adosaun medida kautelár ba planu sira, liuhosi prevene sirkunstánsia faktu ezistente iha parsela balu iha territóriu nian, liuhosi garante liberdade Administrasaun Públika iha elaborasaun planu territóriu no evita atu ezekusaun planu nian iha futuru la komprometida.

Estabelese figura rua hanesan medida preventiva no medida provizória, ne’ebé iha diferensa entre sira tanba envolve definisaun kona-ba forma negativa (proibisaun no limitasaun) no forma pozitiva (aptidaun no vokasaun), ne’ebé determina rejime tranzitóriu aplikavel ida ba rai-rohan ida territóriu.

Jornalista : Antónia Gusmão

Editora      : Julia Chatarina

iklan
iklan

One Comment

Leave a Reply

iklan
error: Content is protected !!