DILI, 27 outubru 2021 (TATOLI)–Komunidade iha área Camea, Bairro-Pité, Manleuana iha munisípiu Dili, enfrenta difikuldade asesu bee-moos durante tinan barak nia laran, tanba ne’e abitante iha área ne’e husu Governu atu rezolve.
“Suku Camea komunidade ne’ebé enfrenta difikuldade asesu bee-moos mak aldeia Bedois, desde uluk tempu Indonézia nian to’o agora, ami tenke lalin masa kalan boot iha tuku 01:00 hodi kuru bee-moos to’o mota-ulun Becora,” Abitante iha aldeia Bedois, suku Camea, postu administrativu Cristo-Rei, Laura smith, dehan ba Agência TATOLI, iha nia rezidénsia, Bedois, kuarta ne’e.
Tuir abitante ne’e, durante pandemia akompaña ho situasaun serka sanitária no konfinamentu obrigatóriu, Governu liuhosi Bee Timor-Leste, Empreza públika (BTL, E.P) monta tanke hodi enxe bee oferese ba komunidade, maibé agora ladún mai enxe ona.
Notísia relevante: BTL,E.P kontinua halo melloramentu sistema bee-moos no saneamentu
“Ami husu ba Governu ajuda lalais rezolve problema bee-moos, tanba ami iha ne’e dala-ruma labarik sira ba eskola tarde tanba de’it bee-moos araska,” nia akresenta.
Iha fatin ketak, Xefe aldeia Bedois, José Pereira Carvalho, hateten, autoridade lokál hato’o ona preokupasaun komunidade ba parte relevante maibé to’o agora seidauk iha rezutadu.
“Governu rasik tun mai halo survey no dehan atu halo kanalizasaun, maibé rezultadu laiha. Ami agradese tebes ba Amu Pároku Bedois tanba nia haree ami loron-loron lalin bee-moos to’o iha mota-ulun Becora, entaun nia ajuda oferese bee ba ami maski la to’o, maibé ajuda netik ami,” nia haktuir.
Komunidade aldeia Bedois ho totál populasaun 1.663, hosi uma-kain hamutuk 287.
Nune’e mós, Abitante iha aldeia Buka Fini no Ruin Naklekar, suku Bairro-Pité, postu administrativu Don Aleixo, Rafael Mendes, hateten, to’o agora komunidade iha área ne’e la asesu bee-moos tanba inundasaun ne’ebé akontese iha loron 04 abríl liubá.
Notísia relevante: Komunidade seidauk bele asesu bee-moos tanba bomba bee estraga totál
“Desde akontese inundasaun, Governu no NGO Partisipa enxe bee-moos iha tanke hodi ami bele konsumu, maibé agora atividade ne’e menus ona, tanba ne’e agora ami mak tau osan hamutuk hodi sosa bee hodi enxe ba tanke ne’ebé iha hodi bele fahe ba malu,” nia dehan.
Tuir Abitante iha área Bairro-Pité, preokupasaun komunidade hato’o ona ba autoridade lokál hodi pasa ba parte kompetente.
“Preokupasaun sira ne’e ami hato’o ona ba líder komunitáriu no hato’o ona ba parte relevante, maibé razaun la lori bee-moos mai tanba transporte no staff laiha atu kontrola iha ami-nia fatin,” nia akresenta.
Rafael Mendes dehan bee-moos ne’ebé sira konsumu antes ne’e dada hosi Dare, maibé kompañia sira ba hadi’a sala, halo bee halai ba Manumeta Rai-hun, entaun aldeia Buka-Fini no Ruin Naklekar hasoru difikuldade asesu bee-moos.
“Husu ba Governu ajuda halo survey filafali ba bee matan iha Dare, nune’e bee halai mai normál fali, tanba aldeia rua ne’ebé agora la asesu ba bee-moos, tinan kotuk asesu bee-moos di’ak hela,” nia tenik.
Iha sorin seluk, Abitante iha suku Manleuana, postu administrativu Don Aleixo, Jacinto Soares, hateten, área ne’e enfrenta difikuldade asesu bee-moos iha tempu bailoron tanba bee ne’ebé liga ba área ne’e kiik loos.
“Ami iha ne’e liga hosi bee-matan Lauloran Metmutu, maibé agora abitante besik bee-matan barak entaun bee mai menus, tanba ne’e bainhira ami atu hetan bee-moos, kalan tenke hadeer to’o tuku 05:00 madrugada mak foin enxe masa sira hodi konsumu, se lae ami la’o to’o kilómetru ida ka rua mak bele hetan bee-moos. Tanba ne’e, husu ba Governu ajuda dada bee-moos ba ami, tanba antes ne’e Governu rasik tun halo ona survey, maibé to’o agora rezultadu seidauk iha,” nia akresenta.
Antes ne’e, BTL, E.P kontinua halo servisu melloramentu operasaun manutensaun ba sistema bee-moos no saneamentu no kontinua promove projetu foun 34 liga ho bee-moos ne’ebé Governu prevee ona orsamentu ba tinan ne’e.
Aleinde ne’e BTL, E.P kolabora ho parseiru atu hadia fazeadamente sistema bee-moos hahú hosi área urbana to’o área rurál.
Jornalista : Arminda Fonseca
Editora : Julia Chatarina
