BAUCAU, 26 outubru 2021 (TATOLI) – Governu liuhosi Ministériu Obra Públika (MOP) hamutuk ho parseiru dezenvolvimentu Uniaun Europeia (UE) inaugura estrada diresaun Defa-Uassi ba Uacala, postu administrativu Baguia, munisípiu Baucau.
Embaixadór Uniaun Europeia ba Timor Leste, Andrew Jacobs elojia EU no Governu Timor-Leste, Governu Alemaña liuhosi GIZ.
Projetu ne’e ho objetivu fasilita dezenvolvimentu ba povu liuhosi kriasaun asesu no ligasaun merkadu ba komunidade agro-florestál hodi mellora produsaun agro-floresta, fornese moris di’ak, redús pobreza, fornese rekuperasaun ekonómia matak haree liubá mudansa klimátika.
“Melloramentu ba asesu ne’ebé apoia agro-florestál, asesu ba serbisu sosiál hanesan eskola, saúde, no nesesidade báziku ho aumenta asesu no mobilidade, kustu transporte ne’ebe uluk aas, redús ona tanba transporte públiku aumenta barak, nune’e mos atividade ekonomia aumenta liuhosi loke merkadu foun tuir estrada ninin, kioske no hari’i uma,” Embaixador UE ko’alia iha suku Uacala, kuarta ne’e.
Embaixadór UE ne’e husu Governu atu mantein estrada ne’ebé konstrui ba sustentabilidade dezenvolvimentu no lori mudansa ba povu Timor-Leste.
Embaixador mós elojia ho sinerjia ka ekipa serbisu entre projetu estrada no PSAF AbF (Parseiru Sustentabilidade Agro Florestal-Ai ba Futuru) projetu ne’ebé buka atu mellora produsaun agro-floresta.
Reprezentante Ministru Obra Públika (MOP) atuál Diretór Jerál Administrasaun Finansa, Januário Barbosa, agradese ba UE ne’ebé apoia finanseira hodi reabilita estrada iha postu Baguia.
Januário husu atu komunidade ne’ebé sai benefísiáriu ba estrada refere atu kontribui kuida nune’e fasilita asesu produtu ba merkadu liuliu hasa’e ekonomia.
Estrada rurál ne’e ho distánsia kilómetru 20.635 iha postu administrativu Baguia liuhosi programa PSAF-AbF entre Governu Timor Leste ho kustu $ 1,858,457.58 ne’ebé finánsia hosi UE, no implementa hosi Organizasaun Internasionál Traballu (ILO, sigla inglés).
Estrada refere, ligasaun ba suku lima kompostu hosi suku Uacala, Defa-Uassi, Alawa Leten, Alawa Kraik no Atelari, ho aldeia hamutuk 17 iha Baguia. Estrada ne’e mós sei benefísia uma-kain 774 no abitante na’in 3,674.
Antes ne’e, Komunidade Uacala la’o-ain ho distánsia kilómteru 8 hodi asesu ba transporte públiku, no projetu ne’e hamosu empregu to’o ema na’in 4,303, na’in 1,007 feto.
Durasaun projetu tinan ida, hahú hosi 2019 to’o oras ne’e, uzu métodu servisu mão de obra hodi fornese serbisu ba komunidade lokál.
Jornalista : Natalino Belo
Editór : Evaristo Soares Martins
