BAUCAU, 27 outubru 2021 (TATOLI) – Xefe Suku Defa-Uassi, Postu Administrativu Baguia, munisípiu Baucau, Salustiano Ximenes Guterres agradese ba governu tanba implementasaun programa Uma Kbiit Laek (UKL) benefísia direita komunidade.
“Programa ne’ebé kapás tebes tanba benefísia direita ba povu bainhira prenxe ona kritériu tanba kondisaun uma ne’ebé aat tebes,” Xefe Suku Defa-Uassi informa ba Agência TATOLI, iha suku Defa-Uassi, kuarta ne’e.
Programa UKL iha suku Defa-Uassi sei finaliza iha fulan-dezembru tanba kondisaun estrada no klima ne’ebé difikulta mós prosesu konstrusaun ne’ebé finánsia hosi Programa Nasionál Dezenvolvementu Suku (PNDS).
“Iha hau-nia suku, uma rua mak atinje ona 60% no ida foin 40%, hotuhotu hosi aldeia defa-Uassi,” Salustiano akresenta.
Medida hosi UKL ne’e 38 m² ne’ebé kada uma aloka kustu $ 15.000 hosi totál $54.108 ne’ebé aloka ba orsamentu fiziku hamutuk $ 51.000, operasional $ 3.000 no fee ba Banku Nasionál Timor-Leste (BNCTL, sigla portugés) $108.
Xefe suku Defa-Uassi akresenta, komunidade antusiazmu maka’as nune’e rekomenda atu programa refere ba oin kontinua implementa tanba komunidade nia barak presiza hetan antensaun hosi governu.
Suku Defa-Uassi hamutuk aldeia haat kompostu Defa-Uassi, Lalibere, Sahemeta no Waru ho totál populasaun 1.125 no uma-kain 225.
Notísia relevante: Suku 59 iha Baucau hahú konstrusaun Uma Kbiit Laek
Jornalista : Natalino Belo
Editór : Evaristo Soares Martins
