DILI, 28 outubru 2021 (TATOLI)– Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, ho Reprezentante Cruz Vermella iha Timor-Leste, (CVTL, sigla portugés), João Martins Alves, selebra akordu kooperasaun ba apoia diseminasaun Lei umanitária internasional no konvesaun sira ne’ebe ratifika ona.
Akordu entre Tenente Jenerál Lere ho Reprezentante CVTL ne’e akompaña direta Xefe Delegasaun Rejionál International Committe of the Red Cross (ICRC) ba Indonézia no Timor-Leste, Alexandre Faite, liuhosi telekonférensia iha Kuartel Jenerál F-FDTL Fatuhada.
Biban ne’e, Tenente Jenerál Lere Anan Timur, konsidera papél Cruz Vermella Timor-Leste asume papél importante apoia umanitáriaiha iha situasaun difísil.
“Kruz Vermella iha situasaun difisil bele halo intervensaun, illa Atauro, ne’ebé ita nia populasaun rihun resin ne’ebé Indonézia destera no atu oho sira, maibé ho apoia umanitária hosi Kruz Vermella Internasionál barak bele moris,” Tenente Jenerál ne’e hateten ba Jornalista sira, kinta ne’e.
Nune’e, Lere konsidera Cruz Vermella nia papél importante iha área umanitária tanba sai patriota no salva komunidade sira nia vida.
Iha biban hanesan, Reprezentante Cruz Vermella iha Timor-Leste, (CVTL, sigla portugés), João Martins Alves, hateten, akordu kooperasaun ba apoa umanitária ne’e durante tinan tolu hahú iha 2021 to’o 2023.
Akordu kooperasaun entre CVTL ho F-FDTL foku ba apoia umanitária sira iha área espesífiku, desimina lei internasionál ne’ebé liga ba direitu umanu no konvensaun internasionál, ne’ebé mak Governu ratifika ona.
Iha tinan 2018, Kruz Vermella Internasionál haruka ona ofisiál F-FDTL balun ba tuir formasaun iha Austrália no nasaun seluk iha área asisténsia umanitária.
Jornalista : Natalino Costa
Editór : Florencio Miranda Ximenes
