DILI, 28 outubru 2021 (TATOLI)— Sekretariadu Tékniku Administrasaun Eleitorál (STAE), realiza enkontru alarga ho Korpu Diplomátiku-sira, hodi atualiza preparasaun téknika Eleisaun Prezidensiál 2022.
“Ita fahe informasaun kona-bá preparasaun téknika eleisaun Presidensiál 2022 ba Korpu Diplomátiku ka embaixador-sira hotu ne’ebé mak ejiste iha ita ni an-rai,” Diretór Jerál STAE, Acelino Manuel Branco, hateten ba Jornalista sira iha Caicoli-Dili, kinta ne’e.
Notísia Relevante: PNUD-STAE-CNE diskute preparasaun eleisaun prezidensiál reziliente ba Timor-Leste
Tanba, Eventu demokrátiku ne’e asuntu universál, la’ós de’it hetan atensaun hosi públiku nivél nasionál, maibé mós nivél internasionál.
“Ita nian prosesu sira iha eleisaun tinan hirak liuba hetan kredibilidade iha nivél nasionál no nivél internasionál,” nia afirma.
Hahú janieru to’o 22 outubru 2021, STAE rejista ona eleitór iha baze dadus hamutuk 885.630, ne’ebé hosi totál ne’e inklui ona ho eleitór iha rai-li’ur haneaan Korea Súl, Portugál no Inglatera.
Totál eleitór nivél terrítoriu nasionál hamutuk 849.094, kompostu hosi mane 443.939 no feto 411.691, no rai-li’ur hamutuk 6.536, kompostu hosi mane 4.548 no feto 1.988, nune’e totál eleitór 855.630.
Elitór foun ein termu idade mak seidauk, maibé foun ein termu jerál ne’ebé rejistu hosi janeiru to’o outubru, kompostu hosi feto 9.535 no mane 10.046, hosi totál 19.605, nune’e rejistu foun iha rai-li’ur hamutuk 48, kompostu hosi mane 24 no feto 24, ne’ebé hafoin atualiza sai 605, kompostu hosi mane 503 no feto 102, nune’eeleitór atulaizadu hamutuk 18.369, kompostu hodi mane 10.736 no feto 7.633.
Tuir lei loron 30 molok tama eleisaun mak STAE fó sau númeru final eleitór sira ne’ebé sei partisipa iha eleisaun Prezidensiál marsu 2022.
“Daudaun STAE nia preparasaun ba eleisaun Prezidensiál intermu tékniku no ekipamentu atinje ona 70% ne’ebé hein deit janeiru 2022 ita emprimu bulletin votu,” Diretór ne’e akresenta.
Iha enkontru alargada ne’, Uniaun Europeia (EU) halo ona asesismentu atu delega ekipa nian observadór mai halo observasaun ba eventu demokrátiku ne’e.
“Uniaun Europeia fó apoiu ba STAE liu-liu iha área kapasitasaun hodi hasa’e koñesimentu rekursu umanu iha área públikasaun aktu eletorál-sira no fó apoia hadi’a infrastrutura STAE ninian iha munisípiu sira,” nia akresenta.
Notísia Relevante: Dadus provizóriu: STAE rejista eleitór 855.630 hosi janeiru-outubru 2021
Jornalista : Natalino Costa
Editór : Florencio Miranda Ximenes
