DILI, 29 outubru 2021 (TATOLI)–Diretór Operasionál Autoridade Inspensaun no Fiskalizasaun ba Atividade Ekonómia Sanitária no Alimentár (AIFAESA), Gabriel da Costa, informa, durante halo fiskalizasaun folin sasán nesesidade bázika iha loja sira Dili laran, nota katak folin normál.
“Monitorizasaun la’o nafatin hodi kontrola nesesidade bázika, maibé to’o agora hosi parte AIFAESA seidauk identifika loja na’in sira hasa’e folin no ami rasik seidauk simu keixa ruma relasiona ho manipula folin sasán, ne’ebé tuir ita-nia haree folin sasán normál,” Diretór AIFAESA hateten ba Agência TATOLI, iha ninia knaar fatin, Matadoru, sesta ne’e.
Iha ábitu loron matebian (finadu), parte autoridade liuhosi Departamentu Operasaun iha Seksaun Komérsiu ba Atividade Komérsiu, kada loron halo monitorizasaun no fiskalizasaun ba parte operadór ekoómiku sira, liuliu ba distributór inklui loja, supermerkadu no kios sira atu hatene folin sasán durante loron-boot.
“Bainhira emprezáriu ruma liuhosi loja ka supermerkadu fa’an sasán ho presu a’as tuir sira-nia hakarak, sei hetan multa administrativa no tuir lei konsidera komete krime, no parte AIFAESA sei hato’o ba Ministériu Públiku,” nia akresenta.
Dekretu-lei numeru 29/2011 kona-ba presu justu, mensiona katak operadór ekonómiku ne’ebé hasa’e folin produtu tantu materiál no nesesidade bazika liu 10%, konsidera hanesan krime no tenke prosesa, ne’ebé kuandu empreza distributór sira fa’an foos kilograma 25 ho folin $10 to’o $15, konsidera tama 10% no kategoria normál.
Jornalista : Arminda Fonseca
Editora : Julia Chatarina
