DILI, 29 outubru 2021 (TATOLI)--Diretór Operasionál Autoridade Inspensaun no Fiskalizasaun ba Atividade Ekonómia Sanitária no Alimentár (AIFAESA), Gabriel da Costa, hateten, durante hala’o knaar iha terrenu iha fulan-outubru, autoridade enserra provizóriu atividade iha restaurante tolu iha Dili .
“Fulan-ne’e nia laran ami halo enserra temporáriu retaurante tolu iha kapitál Dili ho durasaun fulan-tolu,” Diretór Operasaun AIFAESA informa ba Agência TATOLI, iha ninia knaar fatin, Matadouro, sesta ne’e.
Objetivu haruka restaurante-na’in taka provizóriu instalasaun tanba la tuir kritériu ijene nian.
“Ita haree tuir dekretu-lei númeru 28 katak bainhira empreza ruma loke restaurante, fatin tenke ijene, hanesan uma tenke plafon, nahe kramik, hariis-fatin labele hamutuk ho dapur, ne’ebé retaurante tolu ne’ebé ita taka tanba la prienxe rekezitu hirak ne’e,” nia akresenta.
Aleinde taka, operadór ekonómiku sira mós tenke kumpre prosesu administrativa selu multa ho montante kiik liu $1.000 no boot liu $10.000.
Nune’e, hafoin enserra atividade, na’in ba restaurante tenke hadi’a fatin sai di’ak, hafoin ekipa hosi AIFAESA ba haree no verifika fatin instalasaun mak foin bele loke filafali.
“Ita verifika operadór ekonómiku atu konfirma prinxe ona rekezitu, maka ita hasai pareser ida nune’e sira bele hala’o filafali atividade,” nia akresenta.
Nune’e, Diretór AIFAESA apela ba operadór sira, liuliu ba restaurante ne’ebé daudaun ne’e halo hela negósiu, atu kumpre nafatin prosedimentu legál hanesan dekretu-lei kona-ba ijene.
“Ha’u husu ba atu tau atensaun maka’as ba ijene, nune’e ita-nia kosumidór sira bainhira ba han iha ita-boot sira-nia fatin, bele sente seguru, tanba bainhira la tuir dekretu-lei ita sei taka no prosesu multa,” Gabriel da Costa fó hanoin.
Jornalista : Arminda Fonseca
Editora : Julia Chatarina
