DILI, 28 outubru 2021 (TATOLI)— Programa Ai-han Mundiál (PAM) no Governu Xina apoia Ministériu Saúde ho orsamentu millaun $1 atu halo akizasaun ba ai-han nutritivu ba inan-isin rua no inan fó susu-sira ne’ebé sofre má-nutrisaun.
Orsamentu ne’e ho objetivu fornese ai-han nutritivu tonelada 548 ba inan isin-rua no inan fó susu hamutuk 12.000-resin atu konsumu kada fulan durante tinan ida, hodi redús númeru má-nutrisaun.
“Ha’u agradese ba suporta no kometimentu jenerozu husi PAM no Governu Xina atu kombate má nutrisaun iha país ne’e,” Ministra Saúde Odete Maria Freitas Belo, hateten, iha Palasiu Sinzas Caicoli-Dili, kinta ne’e.
Timor-Leste nu’udar nasaun ne’ebé seidauk dezenvolvidu klasifikada husi númeru 108 entre nasaun 116 bazeia ba Índise Dezenvolvimentu Umanu 2021.
“Konsidera populasaun sofre hamlaha 32.4%. Populasaun ho inseguransa ai-han 36% no 40% labarik tinan lima mai kraik sofre má nutrisaun kritiku no kreximentu la’o neineik tebes,’’ Governante ne’e afirma.
Relatóriu preliminariu ai-han no nutrisaun Timor-Leste hatudu 8.9% inan isin-rua no inan fó susu ninia liman kabun menus husi sentímentru 21 to’o 23 ne’ebé risku ba má nutrisaun.
Nune’e, MS disponivél kontinua haforsa kooperasaun ho Programa Aihan Mundiál (PAM) Governu Xina atu atinje Objetivu Dezenvolvimentu Sustentável 2030 atu hakotu hamlaha no halo transformasaun ba sistema ai-han.
Iha biban hanesan, Emabaixadó Xina iha Timor-Leste, Xiao Liangua, afirma iha satisfasaun serbisu hamutuk ho PAM atu apoia MS hodi kombate deznutrisaun iha país ne’e.
“Governu Xina sempre disponível atu reforsa kordenasaun no parseiru ho Organizasaun Nasaun Unida apoia Timor-Leste atinje Objetivu Dezenvolvimentu Sustentável 2020 atu hakotu hamlaha transofrmasaun sistema ai-han,” Diplomátiku ne’e subliña.
Representante PAM iha Timor Leste, Dageng Liu, orgullu ho kontribuisaun jenerozu hosi Governu Xina ba asisténsia ai-han ba populasaun Timor-Leste.
“Ha’u orgullu tebes ho kontribuisaun jenerozu husi Governu Xina, fó asisténsia ai-han, saúde no nutrisaun atu ajuda hakotu sikulu má-nutrisaun iha Timor-Leste,” Dageng Liu konklui.
Jornalista : Felicidade Ximenes
Editór : Florencio Miranda Ximenes
