BAUCAU, 30 outubru 2021 (TATOLI) – Sarani Katólika iha munisípiu Baucau inklui Padre no Madre sira iha Santu António vila antiga hahú prepara fatin hodi Dom Basílio do Nascimento ne’ebé sei to’o iha aban, domingu (31/10).
Padre Vigáriu Parókia Katedrál Baucau, Padre Adérito Victor da Costa, esplika daudaun ne’e hahú forma komisaun urjente hodi oraniza prepara fatin iha Katedrál nune’e aban simu isin-mate Bispu nia isin-mate.
“Hanesan Amu-lulik no sarani sira sente triste no sarani sira voluntáriu fó-aan servisu hodi forma komisaun urjente hodi halo preparasaun lalais,” Padre Vigáriu Parókia Katedrál ko’alia iha Vila Antiga, sabádu ne’e.
Preparasaun dahuluk mak halo dekorasaun fatin hodi rai Dom Basílio nia isin-mate, seluk mak seguransa tanba Bispu konserteza sarani sei partisipa barak nune’e seguransa sei envolve hosi Pólisia Nasionál Timor-Leste no guarda seguransa Dioseze nian.
Kona-ba fatin deskansa komisaun sei prepara fatin deskansa ba sarani sira-ne’ebé mai hosi Parókia seluk inklui Dioseze Dili no Maliana.
Nune’e mós prepara kondisaun hanesan tenta no kadeira iha área Igreja Katedrál nune’e durante omenajen ikus ba Dom Basílio.
“Liturjia ami mós forma ekipa kiik atubele prepara bainhira selebrasaun misa,” Padre Adérito akresenta. Enkuantu loron funerál sei hein Padre Vigáriu Dioseze Baucau foti desizaun liuhosi enkontru tuir mai.
“Serteza katak aban dadeersan mai no ami sei mobiliza sarani hosi Parókia vila antiga no nova atu simu isin-mate Dom Basílio do Nascimento,” Padre Adérito hateten.
Tuir observasaun Agência TATOLI iha terrenu nota katak, hafoin rona tiha novidade tristeza kona-ba Amu Bispu husik ona sarani Katóliku nune’e Padre no madre hahú loke odamatan Igreja Katedrál hodi hamos no prepara antes isin-mate Dom Basílio to’o.
Notísia relevante: PM Taur hato’o sentida kondolénsia ho tristeza ba Bispu Basílio
Jornalista : Natalino Belo
Editór : Evaristo Soares Martins
