BAUCAU, 31 outubru 2021 (TATOLI)—Sarani Dioseze Baucau halo preparasaun másimu atu simu mate-isin Dom Basílio do Nascimento, ne’ebé preparasaun ne’e kuaze konklui ona.
Vigáriu Parokia Katedrál Dioseze Baucau, Padre Adérito Víctor da Costa, hateten, daudaun ne’e falta de’it fatin hafutar Dom Basílio, ne’ebé tuir desizaun Konférensia Episkopál Timorense (CET, sigla portugés), mate-isin sei haloot iha resintu Igreja Katedrál Baucau.
Padre Pároku nu’udar Xefe ne’ebé dirije Parokia, sei komunika ba CET relasiona ho fatin própriu hafutar mate-isin Dom Basílio, ne’ebé sei deside haloot iha Igreja Katedrál laran ou li’ur.
“Preparasaun atinje ona 70% tanba sei hein haloot fatin, hein mós desizaun hosi komisaun ho pároku, hafoin relata fali ba CET ne’ebé deside Bispu Dioseze Baucau tenki hakoi iha Katedrál ne’ebé ukun ba,” Vigáriu Parokia Katedrál hateten iha Igreja Katedral Baucau, domingu ne’e.
Antes ne’e, bazeia ba programa ne’ebé fó sai hosi CET ne’ebé lideradu direita hosi Bispu Dioseze Maliana, Dom Norberto do Amaral, nu’udar mós Prezidente CET, deside ona mate-isin Dom Basílio sei transporta bá Baucau iha segunda (01/11).
Notísia relevante: Konferénsia Episkopál deside haloot Bispu Basílio iha Baucau
Bainhira iha ona Katedrál Baucau, parte komisaun sei fó oportunidade ba sarani parokia hamutuk 24 hosi Dioseze Baucau, kompostu hosi munisípiu Manatuto, Lautém, Viqueque no Baucau, atu halo omenajen ikus ba Saudozu Amu Bispu no sei realiza misa funebre iha oras 10:00 dadeer kuarta (04/11).
Tuir observasaun Agência TATOLI iha Igreja Katedrál, sarani sira hasa’e orasaun ba Dom Basílio do Nascimento.
Komisaun mós hahú monta ona tenda iha resintu Igreja Katedrál hodi sarani sira fó omenajen ikus ba Amu Bispu.
Notísia relevante: Biografia Bispu Basílio no bele ko’alia lian estranjeira neen
Bispu Dioseze Baucau, Dom Basílio do Nascimento, hakotu iis iha Hospital Nacional Guido Valadares (HNGV) iha oras 12:00 iha sábadu (30/10), ne’ebé antes ne’e transporta hosi munisípiu Covalima bá Dili ho aviaun, tanba atakasaun moras fuan.
Amu Bispu moris iha loron 14 juñu tinan 1950 iha Suai no simu ordenasaun espiskopál nu’udar Bispu iha loron 06 janeiru 1997 hosi Papa João Paulo II no sai Nai-Lulik iha loron 25 juñu 1977.
Jornalista : Natalino Belo
Editora : Julia Chatarina
