Preparasaun simu Bispu Basílio, Igreja agradese ba entidade hotu iha Baucau

BAUCAU, 01 outubru 2021 (TATOLI) – Komisaun Organizadora atuál Padre Parókia Santo António Baucau, Padre Manuel da Silva Ximenes, SDB (Saleziano Dom Bosco), urgullu ho kontribuisaun hosi sarani Baucau ne’ebé hamutuk prepara kondisaun hodi simu Bispu Dioceze Baucau, Dom Basílio do Nascimento nia isin-mate.

“Ha’u apresia tebes ho sira-nia preparasaun iha Baucau, nune’e sarani Parókia Manatuto, Laleia no Vemasse sei simu depois to’o Nagardjo, sarani Baucau sira simu liuhosi hosi ninia rezidénsia hanesan vizita ikus depois sei la’o-ain to’o Igreja Katedrál simu hosi membru FALINTIL-FDTL no PNTL antes entrega ba Padre sira iha portaun Igreja Katedrál oin hodi kontinua misa,” Padre Manuel ko’alia iha resintu Igreja Katedrál Baucau, segunda ne’e.

Padre Manuel akresenta, sarani Dioseze Baucau hadomi no sente katak lakon bibi-atan di’ak nune’e sarani sira fó-aan serbisu ne’ebé envolve mós hosi funsionariu, Pólisia Nasionál Timor-Leste no FALINTIL-FDTL.

“Sarani sira serbisu maka’as inklui jornalista sira-ne’ebé sente hadomi ita-nia Amu Bispu Dom Basílio do Nascimento, ha’u urgullu tebes sarani sira-nia domin ba Dom Basílio,” Padre Manuel argumenta.

Kona-ba fatin deskansa ikus Dom Basílio do Nascimento, parte komisaun deside ona haloot iha Igreja Katedrál laran parte liman-loos tuir desizaun Konferénsia Episkopál Timorense (CET, sigla portugués) deside ona.

“Fatin haloot ikus iha Igreja laran, agora rai-kuak prepara hotu ona hein de’it to’o loron kinta (04/10) buat hotu la’o loos ona,” Padre Manuel hateten.

Dom Basílio hadomi Sarani Baucau

Padre Parókia Santo António Baucau, Padre Manuel da Silva Ximenes, ne’ebé durante ne’e besik liu Dom Basílio tanba serbisu hamutuk no koñese di’ak.

Dom Basílio hadomi povu no sarani Baucau, fó-aan no serví sarani Baucau durante tinan 24 tanba ne’e sarani no Baucau oan tomak tenke iha fuan-boot halo sakrifísiu atubele haloot Dom Basílio do Nascimento ho di’ak.

“Ha’u sente lakon, ha’u koñese nia-ema ne’ebé simplisidade, nia fuan nu’udar aman, hadomi ema hotu, bainhira ema-kiak sira mai dere nia odamatan mós simu hotu fó apoia, sempre fó tulun no fuan-boot tebes ba ami amu-lulik sira inklui sarani sira,” Padre Manuel haktuir.

Nia dehan, Bispu Basílio tanba adaptu Baucau entaun ninia karaterístika mós Baucau, aktu ne’e halo tanba Dom Basílio nu’udar Aman ne’ebé hadomi sarani no povu Baucau.

“Ha’u la hatene futuru bele hetan ema hanesan nia ka lae, maibé nia ema ne’ebé hatene haraik-aan,” Padre Manuel akresenta.

Notísia relevante:Bispu Basílio husik ona Dili, Sarani Baucau preparadu

Jornalista         : Natalino Belo

Editór               : Evaristo Soares Martins