BAUCAU, 01 novembru 2021 (TATOLI) – Sarani Dioceze Baucau ho matan-been, tanis, halerik, hakne’ak bainhira simu Dom Basílio do Nascimento nia isin-mate iha rezidénsia to’o Igreja Katedrál Baucau.
Reprezentante Funsionáriu Rezidénsia Bispu Dioseze Baucau, Ernesto da Costa, sente lakon aman domin na’in ba sarani hotu iha Baucau tanba nia parte hili direita hosi Dom Basílio bainhira hahú hakna’ar iha Baucau durante tinan-24 nia laran.
“Ami sira iha-ne’e amu hili, tau fiar durante tinan 24 iha tempu triste no ksolok, nafatin la husik ami, amu ho ami hadomi malu iha fuan durante tinan 24 laran, iha fatin lulik Trilolo, na’in ba rai fó fatin ba amu sai hanesan rezidénsia,” Ernesto hateten iha resintu rezidénsia Dioseze Baucau Tirilolo, uma-lima, segunda ne’e.
Nia agradese ba buat wa’in hotu ne’ebé Dom Basílio fó ba hosi kondutór, kuzineiru, jardineiru no seluk tan.
“Ami bele hetan fali amu hanesan ne’e ka lae, durante tempu susar amu nafatin korajen ba ami atu hasoru situasaun hotu,” Ernesto hateten.
Hosi observasaun Agéncia TATOLI iha terrenu, sarani sira hamonu matan-been bainhira Dom Basílio do Nascimento to’o iha áredór rezidénsia episkopál Baucau, uma-lima, villa antiga.
Sarani sira simu Dom Basílio ho hakneak, tutur-liman, sadere no hakuak-malu tanis bainhira isin-mate to’o iha rezidénsia no la’o-ain ba diresaun Igreja Katedrál, Baucau.
Dom Basílio nia isin-mate to’o iha área Nagardjo Baucau, tuku 14:20, sarani Baucau akompanã liuhosi vila nova to’o iha rezidénsia 15:05, kuaze menutu 30 iha rezidénsia no tuku 15:35 hosi rezidensia hatoba iha Igreja Katedrál 16:05.
Bainhira to’o iha Igreja, sarani sira kontinua tanis, simu ho lian dadolin, moradór sira no kontinua kedas velada nu’udar omenajen no hasa’e orasaun ikus ba Dom Basílio.
Tuir oráriu hosi komisaun, loron ohin nian sei iha selebrasaun misa ne’ebé realiza iha tuku 17:00, kontinua kedas velada hahú hosi oras 20:00 to’o dadersan.
Notísia relevante: Biografia Bispu Basílio no bele ko’alia lian estranjeira neen
Jornalista : Natalino Belo
Editór : Evaristo Soares Martins
