BAUCAU, 01 novembru 2021 (TATOLI) – Konfrontu entre grupu juventude iha suku Samalari, postu administrativu Baucau Vila, munisípiu Baucau, rezulta joven ida mate no ida kanek todan. Kazu ne’e deskonfia tiru hosi ajente polísia ne’ebé halo seguransa iha semitériu.
Xefe suku Samalari, Rui Magno Sequeira, esplika bainhira akontesimentu mosu hafoin komunidade ba kari ai-funan iha semitériu no mosu konfrontu nune’e rezultadu joven ida mate no ida kanek todan, ne’ebé deskonfia tiru hosi ajente PNTL.
“Akontesimentu ne’e iha iha rate Samalari, PNTL evakua ona kanek ba Hospital Referál Eduardo Ximenes (HorEX) no tuir planu sei transporta ba Dili atu halo tratamentu no ida mate agora iha Samalari,” nia informa ba Agéncia TATOLI liuhosi telemóvel, segunda ne’e.
Parte autoridade mós seidauk bele informa identidade loloos hosi vítima na’in-rua tanba sei iha prosesu investigasaun. Kazu ne’e akontese iha loron segunda, 01 novembru, maizumenus tuku 9:00 kalan.
Entretantu, Komandante PNTL Munisípiu Baucau, Armado Monteiro, seidauk bele fó-sai motivu loloos hosi kazu ne’e tanba oras ne’e PNTL munisípiu Baucau iha hela terrenu halo investigasaun.
“Ami agora daudaun iha dalan atu ba Samalari, atu ba observa fatin akontesimentu no halo investigasaun ba ida-ne’e, hotu tiha maka foin fó-sai informasaun ba ita boot sira,” Komandante PNTL Munisípiu Baucau, Armando Monteiro ba Agência TATOLI.
Enkuantu tuir informasaun ne’ebé Agência TATOLI rekolla katak, daudaun ne’e, mate-isin transporta ona hosi suku Samalari mai Hospitál Nacional Guido Valadares (HNGV), Dili, hodi halo autópsia.
Jornalista : Natalino Belo/Natalino Costa
Editór : Evaristo Soares Martins
