DILI, 04 setembru 2021 (TATOLI)—Komisaun C ne’ebé trata asuntu Finansa Públika no komisaun b ne’ebé trata asundu Ekonomia no Dezenvolvimentu, halo audiénsia públika ho Ministériu Petróleu no Minerál (MPM) relasiona ho verba ministériu iha Orsamentu Jerál Estadu (OJE) 2022.
Tuir Ministru Petróleu no Minerál, Víctor da Conceição Soares, molok tama audiénsia públika ho komisaun espesializada, MPM halo reuniaun ho instituisaun tutela sira no identifika katak alokasaun ba tinan oin la to’o no presiza tan adisionál milliaun $45,2, nune’e bele hetan milliaun $89,4 hodi distibui ba instituisaun tutela hanesan Institutu Petróleu no Jeolójia, Autoridade Nasionál Petrolium no Minerál (ANPM), Timor Gap inklui kompañia nasionál minerál ne’ebé sei estabelese iha tempu besik.
“Presiza tan osan adisionál tanba iha projetu lubuk ida ne’ebé la’o hela, ita labele hapara ka paraliza atividade ne’ebé ein kursu, tanba ne’e ami mai Parlamentu Nasionál hamutuk ho deputadu sira iha komisaun C no D hodi fó hanoin lisuk oinsá atu repoin filafali orsamentu ne’ebé antes ne’e bele iguál superiór milliaun $85,5, nune’e atividade sira bele la’o,” Ministru hateten iha Parlamentu Nasionál, kinta ne’e.
Antes ne’e, iha MPM hetan pakote fiskál tinan 2022 hosi Ministériu Finansa (MF) hamutuk millaun $2,4 no bainhira iha Komité Revizaun Orsamentu Polítika (KROP), parte ministériu propoin adisionál millaun $113 hodi investe ba atividade petróleu no minerál, maibé aprova de’it millaun $45,2.
“Pakote OJE 2022 ho montante milliaun $42.257.061 ne’ebé ami simu sente katak la sufisiente, kompara ho tinan 2021 ami hetan orsamentu milliaun $85,5,” nia akresenta.
Notísia relevante: OJE 2022: MPM husu adisionál millaun $113 investe iha petróleu-minerál
Orsamentu ba tinan oin, aloka ba programa rua importante hanesan jestaun rekursu petróleu no minerál ho totál orsamentu $41.400.084 no boa govenasaun jetaun instituisionál ho totál orsamentu milliaun $856.977.
Ministru dehan, razaun husu adisionál tanba iha tinan ne’e, iha projetu petróleu ne’ebé la’o hela hatudu susesu lubuk ida, iha indikasaun pozitivu no tendénsia katak reseita ba fundu petrolíferu ba tinan oin ne’e iha aumentu.
“Rekomendasaun ne’ebé ami halo hodi konsidera orsamentu adisionál ho valór $45,2 ne’e ba utilizasaun funsionamentu ministériu tuir orgánika no garante nafatin kreximentu fundu, reandamentu no akizasaun ba futuru instalasaun hosi MPM ho ninia instituisaun tutela sira,” governante ne’e tenik.
Nune’e, bele kontinua asegura investimentu no dezenvolvimentu ba diversifiasaun setór petrolíferu no minerál iha tasi-laran no rai-maran, dezenvolvimentu ba kampu Greater Sunrise, promosaun ba bloku petrolíferu ne’ebé daudaun ANPM la’o hela iha rai-li’ur hodi promove no kontinua halo estudu explorasaun detallu rekursu petróleu no minerál iha área hirak ne’e.
Aleinde ne’e, halo promosaun ba bloku 18 iha rai-maran no tasi-laran, ne’ebé presiza atividade promosaun lubuk ida iklui viajen ba estranjeiru no ba munisípiu sira.
Enkuantu, ba ezekusaun orsamentu 2021 ba MPM atinje 90%, inklui tranferénsia públika ba intituisaun tolu no alokasaun orsamentál ne’ebé uluk hafoin hasai 7% hosi fundu COVID-19, MPM iha 79,5%, ne’ebé hahú ho 83,4%.
“Daudaun ne’e ezekusaun hela fulan rua ne’e hela de’it 2%, tanba ne’e iha nível Governu, MPM hetan kategoria klasifikasaun dahuluk ba ezekuasaun OJE 2021 nian,” Ministru tenik.
Jornalsita : Arminda Fonseca
Editora : Julia Charina
