DILI, 04 novembru 2021 (TATOLI)—Vise-Reitór Universidade Nasionál Timor Lorosa’e (UNTL) ne’ebé trata asuntu akadémiku no garante kualidade, Samuel Venâncio Freitas, hateten, daudaun ne’e universidade ne’e foin simu inskrisaun hosi estudante hamutuk 3.870.
“Agora aprezenta ona ba reitoria UNTL hodi submete ba Ministériu Ensinu Superior Siénsia no Kultura (MESSK) iha tempu besik,” Vise-Reitór hateten iha ninia knaar fatin, Kmapus UNTL, kinta ne’e.
Antes ne’e, universidade sira halibur dadus estudante, ne’ebé kada benefisiáriu sei hetan izensaun propina $150 ba semestre ida no internet gratuita $10 ba fulan-tolu.
Prosedimentu atu sai benefisiáriu ba programa rua ne’e, ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.
“Dadus estudante UNTL ne’ebé aprezenta ba MESSK hamutuk 27.000-resin, ne’ebé hosi totál dadus ne’e daudaun estudante 3.870 mak foin halo inskrisaun. Ita haree didi’ak hodi hatene estudante sé mak sei ativu iha semestre liubá hodi hetan subsídiu, ita foin ezekuta ba estudante hamutuk 3.870, tuir lista ne’ebé ha’u simu,” nia akresenta.
Tuir Vise-Reitór, estudante hirak ne’ebé halo ona inskrisaun, akumula hosi lista estudante kontinjente 2021.
“Hosi dadus fiksu tinan ne’e, iha totál hamutuk 5.000–resin maibé agora foin akumula 3.000-resin de’it, ne’e duni inskrisaun sei hala’o nafatin, metade estudante tinan ne’e ho tinan 2020 mai kraik daudaun ne’e iha ona 19.000-resin,” nia informa.
Hosi dadus ne’ebé iha ona, parte universidade daudaun submete ba MESSK hodi hein tan lista ba faze daruak, tanba durasaun tempu ne’ebé Governu fó ba universidade fulan-tolu de’it maibé prazu liu ona.
“Tanba ne’e, parte universidade ezije atu estudante sira tenke lalais halo rejistu tanba tuir informasaun sei iha oportunidade ba faze daruak, maibé bainhira Governu atu fó subsídiu foun tenke simu uluk relatóriu hosi subsídiu dahuluk, kuandu tama hotu ona maka ministériu bele ezekuta tan planu seluk,” nia tenik.
Tuir Vise-Reitór UNTL, sistema inskrisaun ne’ebé hala’o iha universidade ne’e sai barómetru ida atu tinan oin kuandu iha tan programa apoiu hosi Governu, parte universidade bele kria sistema rejistu di’ak liu atu fasilita estudante ho lalais.
Ministériu aloka millaun $14 ba izensaun propina no millaun 2,1 ba internet gratuita.
Antes ne’e, MESSK simu dadus estudante universitáriu hamutuk 63.523 atu asesu ba programa rua ne’e.
Jornalista : Tomé Amado
Editora : Julia Chatarina
