DILI, 4 novembru 2021 (TATOLI)- Tuir dadus hosi Ministériu Saúde, hatudu katak vasina Pfizer ba sidadaun ho idade 12 to’o 17 atinje ona 3.8%.
“Sidadaun ho idade 12 to’o 17 ne’ebé simu ona vasina Pfizer doze dahuluk 3.8% ne’ebé ekivalente 6.939,” refere nota ne’ebé Agência TATOLI asesu, segunda ne’e.
Estudante sira ho idade 12 to’o 17 iha munisípiu Dili no munisípiu seluk simu ona vasina Pfizer hodi proteje ho efikásia 95% hosi infesaun sintomátika SARS-CoV-2.
Governu liuhosi Ministériu Saúde lansa ona vasina Pfizer doze dahuluk, hahú 27 outubru to’o novembru 19, hafoin 20 novembru tama ba doze daruak.
Tanba, define doze daruak hosi vasina ne’e sei administra ho intervalu loron 21.
Mekzanizmu COVAX liuhosi doasaun hosi Estadu Unidu Amérika (EUA) entrega ona vasina Pfizer doze 100.620 ba Governu Timor-Leste.
Tuir planu vasinasaun ne’e sei realiza iha eskola sira no ba alunu foin-sa’e 50.000-sira hosi 60 to’o 110 ano, hosi munisípiu pre selesionadu ne’ebé maka sei simu vasina ba dahuluk.
Timor-Leste rejista totál kazu konfirmadu pozitivu COVID-19 ba labarik tinan 18 mai kraik na’in-3.661 (19%) no óbitu na’in-13 (11%).
Alende ne’e, totál vasina AstraZeneca no SINOVAC ne’ebé fó ona ba sidadaun iha territóriu nasionál hamutuk 934,127.
Hosi totál ne’e, populasaun elijível tinan 18 ba leten, ne’ebé simu ona vasina iha loron 3 novembru tuir sistema informasaun Saúde iha Ministériu Saúde ho vasina AstraZeneca kumulativu 1ª doze iha 74.4% no kumulativu 2ª doze 48.5%.
Sala Situasaun, Sentru Integradu Jestaun Krize (CIGC,sigla Portugés), horisehik, (03/11) relata, kazu detetadu foun laiha, rekuperadu 18 no kazu ativu 14
Nune’e, hahú 21 marsu 2020 to’o 03 novembru 2021, rejista kazu kumulativu konfirmadu hamutuk 19.790, kumulativu rekuperadu 19.654 no kumulativu óbitu 122.
Notísia Relevante: COVID-19: kazu pozitivu laiha, rekuperadu 18 no ativu 14
Jornalista : Felicidade Ximenes
Editór : Florencio Miranda Ximenes
