iklan

DESPORTU, DILI, HEADLINE

Manán 1-0, Ultramar lidera tabela klasifikasaun ho pontu 10

Manán 1-0, Ultramar lidera tabela klasifikasaun ho pontu 10

Jogadór Nagarjo FC hadau malu bola ho jogador Atletico Ultramar (kamijola metan) iha joga divisaun II, Liga Futeból Timor-Leste, kuarta 20 Otubru 2021 iha kampu Demokrasia Dili, Imajen Tatoli/António Gonçalves

DILI, 04 novembru 2021 (TATOLI) – Ekipa eis primeira divizaun Atletiku Ultramar iha oportunidade boot hetan tikete ultrapasa hikas ba primeira divizaun iha époka ne’e hafoin iha jogu haat tutuir malu sempre hatudu rezultadu di’ak manan dala tolu no empata dala ida.

Vitoria ne’ebé Ultramar “konkista” hafoin manan nia adversáriu Santa Cruz FC iha jogu kontinuasaun Liga Futeból Timor -Leste (LFTL) ne’ebé hala’o, kinta loraik ne’e iha Estádiu Munisipál Dili ho rezultadu 1-0.

Hosi rezultadu ne’ebé Ultramar iha lori ekipa ne’e mantein nia titulu lidera iha grupu B ne’ebé kompostu hosi ekipa neen hanesan, Atletiku Ultramar provizóriu lidera tabela klasifikasaun ho pontu 10, Emanuel FC pontu neen, Santa Cruz FC pontu neee, Nagardjo FC pontu tolu, Lika-Lika Lemorai FC pontu rua, no Kablaki FC pontu ida.

Hanesan baibain minutu  primeiru ekipa rua lansa kedan kontra no atake ba malu hodi buka hatama golu liu hosi duir bola hosi ain ba ain.

Forsa ba ekipa rua kuaze hanesan , maibé oportunidade barak liu ba Ultramar atu halo golu, la konsege tanba sutu baraka jogadór sira halo la kona iha alvu.

Hafoin tama minute 17 jogadór Ultramar Elvis da Silva (11) konsege ezekuta duni oportunidade ho di’ak hodi fura rede Santa Cruz asegura hosi guarda rede Marcio das Dores (30) la konsege salva rezultadu hatur kedan ba 1-0.

Jogu la’o manas liután tanba ekipa rua halo kontra no atake ba malu makas tebes, maibé ekipa ne’ebé lidera hosi treinadór João Feliciano labele halo buat ida tanba jogadór ne’ebé lidera hosi treinadór Moises da Silva la fó fatin.

Nune’e, too minutu primeira parte termina laiha tan golu ruma mak akontese ba ekipa rua, Ultramar provizóriu lidera jogu.

Hakur ba segunda parte ekipa rua nafatin hatudu jogu bonitu hodi anima adeptu-sira iha tribun leten, maibé kontra no atake ne’ebé ekipa rua hatudu iha segunda parte la lori rezultadu di’ak tanba to’o minute termina laiha tan golu ruma mak akontese ba ekipa rua ne’e.

Ho nune’e Ultramar mak iha direitu absoluta ba pontu tolu no Santa Cruz hela ho derota hodi hein jogu seluk tuir mai.

Ultramar hanesan ekipa antigu iha Primeira Divizaun ne’ebé degrada ba segunda divizaun iha 2019-liu ba ho nia rival Academica FC, maibé jogu agora dadauk hatudu ekipa rua ne’e sei iha oportunidade boot atu ultrapasa hikas ba primeira divizaun hanesan uluk.

Tanba, iha grupu A lidera hosi Academica FC ho pontu hitu, enkuantu iha grupu B lidera hosi Ultramar.

Tuir istória Ultramar hamahan an iha LFTL konsege sai ona kampiaun ba segunda divizaun iha 2017, sai kampiaun dala rua tutuir malu ba taxa 12 de Novembru iha 2017 no 2018.

Jornalista : Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!