COVALIMA, 05 novembru 2021 (TATOLI)—Ministériu Edukasaun Juventude no Desportu (MEJD) hamutuk ho Apoiu lideransa Mentoria no Aprendizajen (ALMA) fó formasaun kona-ba jestaun ba koordenadór eskola sira iha Covalima
Vise-Prezidente Gabinete Formasaun Profisionál Instituto Nacional de Formação de Docentes e Profissionais de Educaçao (INFORDEPE), Rui da Costa Belo, hateten formasaun kona-ba jestaun ba líder eskola sira hanesan diretòr, adjuntu diretòr ka koordenadór eskola no feto potensiál sira oinsá bele jere eskola liu-liu liga ba prosesu ensinu aprendizajen ne’ebè sei hala’o durante loron rua.
MEJD hamutuk ho ALMA la’ós foin mak fó formasaun kordenadór eskola sira maibé formasaun ne’e ba datoluk ona, ne’ebé formadór sira mai hosi INFORDEPE no parseiru ALMA rasik ne’ebè haree liu ba jestaun lideransa.
“Maske líder eskola sira iha ona kuñesimentuu maibé ita presiza fó formasaun nafatin. Iha matéria balun sira iha ona kuñesimentu no balun seidauk, no ho formasaun ne’e sira bele iha kuñesimentuhodi bele jere eskola ho di’akliu no observa nia profesór hanorin estudante sira iha sala-de-aula iha eskola,” Rui da Costa Belo hateten ba jornalista sira iha Salaun Eskola Sekundáriu Jerál Suai, sesta ne’e.
Nia dehan, durante ne’e diretór eskola balun la kontrola nia profesór sira hanorin iha sala-de-aula, nune’e liuhosi formasaun ne’e oinsá sira bele halo monitorizasaun bainhira nia profesór hanorin iha sala-de-aula.
Formasaun kona-ba jestaun ne’e realiza ona iha munisípiu Bobonaro, Liquiça, Manatuto Lospalos no Covalima ne’ebè hetan apoiu finanseira hosi embaixada Austrália.
Diretór Ensinu Báziku Sentrál (EBC, sigla portugés) Dato Tolu, Adão da Cruz, hateten formasaun ba diretór ka koordenadór eskola sira-ne’e importante, nune’e bele líder eskola sira iha kuñesimentu atu orienta profesór sira hanorin estudante iha sala-de-aula.
“Formasaun ida-ne’e importante atu hasa’e ami-nia kuñesimentu oinsá atu bele fó orientasaun ba ami-nia membru sira bele hanorin bazea ba kúrikulu no métodu hanorin mós bazea ba padraun hosi MEJD,” Adão hateten.
Nia dehan, durante ne’e hasoru difikuldade atu orienta profesór sira oinsá atu hanorin estudante bazea ba métodu, kúrikulu no tuir padraun hosi MEJD.
Tuir observasaun, formasaun durante loron rua ne’e partisipa másimu hosi diretór eskola no koordenadór eskola sira hosi postu administrativu hitu (7) iha munisípiu Covalima.
Jornalsita : Celestina Teles
Editór : Cancio Ximenes
