DILI, 05 novembru 2021 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, hateten, atu realiza izensaun pagamentu propina ba estudante iha semestre daruak tinan letivu 2021, presiza relatóriu hosi instituisaun ensinu superiór públiku no privadu.
“Ita presiza de’it universidade sira tenke submete lalais relatóriu semestre dahuluk tanba durasaun tempu loron 90 ne’e to’o loron 31 outubru, ne’e liu ona. Kuandu sira aprezenta hotu ona posibilidade pagamentu semestre daruak bele hahú ona,” Ministru Longuinhos hateten iha resintu Parlamentu Nasionál, sesta ne’e.
Antes ne’e, iha loron 14 no 15 jullu, Ministériu Finansa (MF) transfere verba ho montante millaun $5,6 ba konta universidade 18, hodi realiza izensaun pagamentu propina ba estudante hamutuk 64.619, durante loron 90 nia laran, hahú loron 16 jullu to’o 16 outubru.
“Ita prevee ona orsamentu millaun $14 hodi halo pagamentu ba estudante sira iha semestre dahuluk nian, ita hasai ona osan millaun $5,6 ba izensaun pagamentu propina estudante,” governante ne’e akresenta.
Notísia relevante: MF realiza pagamentu izensaun propina ba estudante ensinu superiór 64.619
Nune’e, hafoin universidade reembolsa direitu verba ba estudante sira liuhosi izensaun propina, iha loron 15 nia laran tenke halo relatóriu ba MESSK, ne’ebé bele aprezenta hahú loron 15 to’o 30 outubru.
Tuir Ministru, molok atu halo pagamentu, tuir regra ne’ebé tenke kumpre maka MESSK sei halo fali nota entendimentu ho universidade sira, hafoin rezultadu konkordánsia ne’e sei submete ba MF.
Enkuantu, orsamentu restu hosi montante ne’ebé Ministériu prevee kuandu la ezekuta hotu, tenke filafali ba kofre Estadu.
Tuir diploma ministeriál númeru 34/2021 19 maiu, kona-ba prosedimentu inzensaun pagamentu propina hosi parte estudante ensinu Superiór nasionál, mensiona kada estudante benefisiáriu sei hetan izensaun propina $150 ba semestre ida ho prosedimentu ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.
Aleinde ne’e, instituisaun ensinu Superiór ne’ebé sai befisiáriu ba programa tenke reembolsa ba estudante inskritu, valór propina to’o montante másimu $150.
Instituisaun ensinu superiór públiku no privadu akreditadu hamutuk 18 ne’ebé sai benefisiáriu ba programa medida apoiu estudante mak hanesan Dili Institute of Technology (DIT), East Timor Coffee Institute (ETCI), Institute of Business (IOB), Instituto Boaventura Timor-Leste (IBTL), Instituto Católico Formação de Professores (ICFP), Instituto Ciências da Saúde (ICS), Instituto de Ciências Religiosas (ICR), Instituto Filosófico S. Francisco de Sales (IFFS).
Nune’e mós, Instituto Politécnico de Betano (IPB), Instituto Profissional de Canossa (IPDC), Instituto S. João de Brito (ISJB), Instituto Superiór Cristal (ISC), Instituto Superiór de Filosofia e Teologia (ISFIT), João Saldanha Institute (JSI), Universidade de Díli (UNDIL), Universidade de Paz (UNPAZ), Universidade Nacional de Timor Lorosa’e (UNTL), no ikus liu mak Universidade Oriental Timor Lorosa’e (UNITAL).
Jornalista : Tomé Amado
Editora : Julia Chatarina
