DILI, 05 novembru 2021 (TATOLI)—Komisaun C ne’ebé trata asuntu Finansa Públika no Komisaun E ne’ebé trata asuntu Infraestrutura halo audiénsia públika ho Ministériu Obra Públika (MOP), relasiona ho Orsamentu Jerál Estadu (OJE) 2022.
“Orsamentu tinan oin ba MOP hamutuk $160.431,417 ba programa lima no sub-programa 11, ho atividade 40,” Ministru Obra Públika, Salvador Eugênio Soares dos Reis Pires, informa durante audiénsia públika, iha sala plenária, Parlamentu Nasionál, sesta ne’e.
Iha biban ne’e, MOP relata prosesu ezekusaun OJE 2021 hosi janeiru to’o 31 outubru, ne’ebé atinje ona 95,1% no iha previzaun to’o iha dezembru bele ezekuta hotu.
MOP nu’udar departamentu governamentál ne’ebé responsável ba konsesaun, ezekusaun, koordenasaun no valiasaun ba polítika ne’ebé define no aprova hosi Konsellu Ministru iha área obraa públika, planeamentu urbana, abitasaun abastementu, distribuisaun no gestaun água, saneamentu no eletrisidade iha artigu númeru 2, dekretu lei númeru 8/2019 24 abríl.
Notísia relevante: MOP hahú define prioridade bazeia pakote fiskál tinan 2022
Bazeia livru orsamentál, orsamentu alokadu ba MOP ba tinan oin kompostu hosi saláriu no vensimentu $3.113.499, bens no servisu $26.086.873, kapitál menór $1.046.096, kapitál dezenvolvimentu $23.184.949 no tranfarénsia públika $160.431.417.
MOP nia programa prioridade lima hanesan pre-programa estrada, ponte kontrolu kualidade cheia ho kustu millaun $32 dezenvolvimentu rurál urbanu millaun $3, boa-governasau no jestaun instituisionál $16, água no saneamentu milliaun $17 no eletrisidade milliaun $90.
Estimativa forsa traballu hosi MOP hamutuk 1.425 iha tinan oin, kompostu hosi feto 304 no mane 1.121, no funsionáriu kargu diresaun no xefia 63.
Programa estrada no ponte ba médiu prazu, ho alvu estrada nasionál no rejionál totalmente reabilitada tuir padraun internsionál to’o 2030, enkuantu sub-programa infraestrutura estrada, ponte no kontrolu cheia ho ninia atividade maka konstrui, reabilita no melloramentu estrada urbana, konstrui reabilitasaun estrada no ponte iha área rurál, mantein konserva kondisaun estrada nasionál, munisipál, zona urbana no rurál.
Nune’e, mantein konserva kondisaun estrada nasionál no munisipál, rekupera kondisaun estrada no ponte (ka resposta emerjénsia).
Aleinde ne’e, sub-programa MOP investe mós ba planeamentu atualizasaun manutensaun no regulamentasaun ba rede redoviária, ho atividade kapasita dezenvolve instituisionál, dezenvolve, divulga no implementa kuadru jurídiku, planeia, peskiza no dezeña estrada ponte no kontrolu cheia, rejista baze dadus estrada, ponte cheia, no kontrolu kualidade obra hotu.
Enkuantu, boa-governasaun no jestaun instituisionál ba médiu prazu no sub-programa boa-governasaun koordena jere obra públika, halo planeamentu dezenvolvimentu estratéjiku no orientasaun públika, atividade inspensaun, fiskalizsaun no auditoria, koordena no jere servisu korporativu, apoiu jurídiku no koordena no koordena abitasaun no planu urbana.
Nune’e, ninia sub-programa, planeamentu atividade monitorizasaun estatístika, jestaun rekursu umanu, apovizionamentu jestaun kontratu, administrasaun jerál, jestaun finansia, no jestaun patrimóniu.
Jornalista : Arminda Fonseca
Editora : Julia Chatarina
