DILI, 8 novembru 2021 (TATOLI)— Minsitériu Saúde liuhosi Médiku Jerál Hospitál Nasionál Guido Valadares (HNGV) hala’o konsulta saúde masál no vasina COVID-19 ba sobrevivente 12 Novembru hamutuk 90-resin.
“Ami hala’o atividade konsulta masál no vasina ba sobrevivente 12 Novembru tanba importante tebes ita atu kontrola saúde sobrevivente no prevene trasmisaun COVID-19 iha ita-nian rai,’’ Ministra Saúde, Odete Maria Freitas Belo, hateten iha SEJD-Lecidere, segunda ne’e.
Notísia Relevante: Governu aloka $21.000 komemora masakre Santa Kruz 12 Novembru
Tuir Ministra, atividade ne’e hanesan kampaña vasinasaun hasoru COVID-19 hodi fó susesu no konvense sidadaun atu partisipa simu vasina.
Komemorasaun 12 novembru dala-30 ho tema “Komemorasaun Masakre Santa Cruz ho Espíritu Asuwain 12 Novembru Nian, Juventude Sai Autor Importante ba Proteje Timor -Leste hosi COVID-19”.
Nune’e, Programa neen mak Komisaun Organizadora trasa ona hahú husi kalan reflesaun no mis aba Saudozu Sebastião Gomes ne’ebé hala’o ona iha loron 27 no 28 fulan-outubru, iha loron 08 novembru hala’o konsulta masál ba sobrevivente hotu, iha loron 10 novembru halo limpeza jerál iha semitériu Santa Cruz, 11 novembru kalan halo reflesaun iha semitériu Santa Kruz no 12 novembru halo komemorasaun ba loron importante ne’e.
Iha biban hanesan, Prezidente Komité 12 Novembru, Gregorio Saldanha, hateten, Komité 12 novembru no Sekretariu Estadu Juventude no Desportu kolabora ho HNGV hala’o konsulta masál ba sobrevivente sira ne’ebé uluk simu torturasaun husi militár Indonézia.
“Ita mós halo vasinasaun COVID-19 ba sobrevivente sira tanba atubele proteje aan hosi pandemia globál. Ita mós husu ba sobrevivente sira ne’ebé mak seidauk vasina bele mós simu vasina no halo mos konsulta jerál ba moras sira seluk,’’ Prezidente Grigorio Saldanha afirma.
HNGV hala’o konsulta saúde masál ba sobrevivente 12 novembru no mós loke ba públiku liuliu joven sira ne’ebé mak hakarak konsulta saúde no simu vasina.
Entretantu, Governu liuhosi Sekretáriu Estadu Juventude no Desportu aloka orsamentu $21.000 ba Komisaun Organizadora komemorasaun Masakre Santa Kruz 12 novembru ba-dala 30 no selebrasaun loron nasionál juventude 2021.
Notísia Relevante: Sobrevivente 12 novembru: sai koordenadora ba unidade TBC atu servi povu
Jornalista : Felicidade Ximenes
Editór : Florencio Miranda Ximenes
