DILI, 08 novembru 2021 (TATOLI)—Komisaun D ne’ebé tratara asuntu Ekonomia no Dezenvolvimentu halo audiénsia públika ho Ministériu Turizmu, Komérsiu no Indústria (MTKI) kona-ba alokasaun ministériu iha Orsamentu Jerál Estadu (OJE) 2022.
“Orsamentu tinan oin hamutuk $13.584.356, ba programa tolu, sub-programa 15, no atividade 57,” Ministru Turizmu, Komérsiu no Indústria, José Lucas do Carmo da Silva, hateten, hafoin audiénsia públika, iha sala Komisaun D, iha Parlamentu Nasionál, segunda ne’e.
Hosi totál ne’e fahe ba saláriu no vensimentu $1.828.184, bens no servisu $5.490.852, transferénsia públika $6.039.000, kapitál menór $94.320, no kapitál dezenvolvimentu $132.000.
Aleinde ne’e, MTKI iha programa hanesan boa-govenasaun no jestaun instituisionál ho alokasaun $3.507.563, turizmu $2.763.183, inklui investimentu no diversifikasaun ekonómika $7.403.610.
Estimasaun forsa traballu MTKI rasik hamutuk 639 iha tinan oin, kompostu hosi feto 243 no mane 396 inklui funsionáriu kargu diresaun no xefia 76.
Tuir Ministru, ba programa área turizmu, partikular turizmu komunitáriu, daudaun ne’e hala’o hela iha fatin pilotu lima hanesan suku Uailili iha Baucau, suku Uaimoritula iha Viqueque, suku Maubisse villa iha Ainaro, suku Nunumoge iha Ainaro no suku Seloi iha Aileu.
Notísia relevante: Suku lima sai pilotu ba programa dezenvolvimentu turizmu komunitáriu
MTKI aloka ona osan ba tinan oin hodi hala’o programa Jornál Rezisténsia, ne’ebé atu identifika no explora fatin istóriku sira ne’ebé uluk gerrilleiru sira uza sai subar fatin.
“Liuliu iha parte leste hanesan Waibitai Matebian atu konstrui fatin ruma no Lariguto, postu Ossu, munisípiu Viqueque atu harii uma dame ida,” Ministru tenik.
Enkuantu setór turizmu iha parte oeste, sei halo programa ida naran ‘Mambae Coffee Trails’.
“Programa ne’e ho objetivu atu prezerva no konserva fatin istóriku rezistésnia no konserva kafé, partikulármente ba kafé lakuten ne’ebé iha ninian valór ekonómiku di’ak tebes iha merkadu,” governante ne’e esplika.
Programa boa-governasaun no jestaun instituisionál ba médiu prazu ho alvu atu konstrui planu estratéjiku ne’ebé aprovadu, konfiansa Governu no planu médiu prazu.
Sub-programa boa-governasaun ho ninia atividade mak peskiza, planeamentu no dezenvolvimentu, inspesaun fiskalizasaun, auditoria, no koordena servisu korporativu.
Programa investimentu maka atu deversifika ekonomika ba médiu prazu, ho ninia sub-programa mak regulamentasaun no kontrolu inklui inspensaun no monitorizasaun ba atividade ekonómika.
MTKI nu’udar departementu governamentál ne’ebé responsável ba konsensaun, ezekusaun, koodenasaun, no avaliasaun ba polítikua ne’ebé define no aprova hosi Konsellu Ministru iha área turizmu ba atividade ekonómika, komérsiál no industria.
Jornalista : Arminda Fonseca
Editora : Julia Chatarina
