DILI, 09 novembru 2021 (TATOLI)– Ekipa Segunda Divizaun Academica FC susesu iha nia jornada hodi utrapasa ona ba Primeira Divizaun iha époka ne’e, hafoin manán iha jogu ikus hasoru Zebra FC ho rezultadu 3-1.
Bainhira jogu la’o, iha minutu primeira parte ekipa rua hala’o jogu ho ritmu hanesan no ho ambisaun atu hatama golu hodi hetan vitoria.
Maski, iha difikuldade uitoan ba ekipa rua tanba jogu to’o iha minutu 20 akontese udan hodi rezulta bee nalihun makas kampu iha estádiu Dili, afeta ba jogadór-sira duir bola ba mai, maibé Zebra aproveita kedan oportunidade udan ne’e hodi halo kontra no atake ne’ebé makas ba Academica.
Kontra no atake ne’e fó duni rezultadu tanba iha minutu 27 jogadór Estevão Soares (7) lansa ona golu dauluk hodi hatur rezultadu ba 1-0.
Ho golu ne’e, jogu kontinua manas liután, nune’e avansadu Academica nian Juvinal Boavida (19) no Pascoal Soares (9) ho nia amigu sira lansa sutu barak ba rede Zebra, la kona iha alvu.
Ho nune’e to’o minutu 45 termina laiha golu ruma mak akontese ba ekipa rua no Zebra lidera provizóriu jogu.
Tama ba segundu parte, ekipa Zebra hatudu jogu ho ambisaun atu manan jogu ho mehi ida atubele impede Academica labele utrapasa ba Primeira Divizaun.
Maibé, mehi ne’e hela de’it hanesan mehi tanba jogadór Academica nian halo presaun makas ba rede Zebra nian ne’ebé guarda hosi Berimiro Belo (30).
Presaun hirak ne’e sai duni realidade no fó sorte di’ak ba Academica tanba jogadór Juvinál Boavida (19) hala’o jogu ne’ebé bonitu no konsege marka golu, iha minutu 52 hodi muda skore ba 1-1.
Hosi golu ne’e, jogadór Academica hahú iha vontade ne’ebé di’ak no solidu, nune’e iha minutu 80, jogadór Helder Lopes (17) lansa tan golu ida muda rezultadu ba 2-1.
Jogu la’o ona to’o minutu 87 sorte di’ak monu tan ba Academica liuhosi avansadu Pascoal Fernandes (9) hatama tan golu 3-1. Nune’e to’o minutu termina laiha tan golu ruma mak akontese no vitoria hela hakmatek ba Academica nia liman.
Iha grupu A ne’ebé konsege utrapasa ona Primeiru Devizasaun, hanesan Academica okupa númeru dahuluk iha tabela klasifikasaun ho pontu 10 no Porto Taibessi ho pontu hitu, maibé sei hein jogu ikus kontra FIEL FC.
Jornalista : Hortencio Sanchez
Editór : Florencio Miranda Ximenes
