RHTO-WVTL realiza formasaun defisiénsia jéneru ba joven Vemasse
BAUCAU, 09 novembru 2021 (TATOLI) – Organizasaun Ra’es Hadomi Timor Oan (RTHO) hamutuk World Vizion Timor-Leste (WVTL) realiza formasaun defisiénsia jéneru ba joven na’in-31 hosi suku lima iha postu administrativu Vemasse.
Objetivu hosi formasaun defisiénsia jéneru (gender disability) ne’e atu respeita ema ho defisiénsia hanesan ema seluk tanba dalabarak ema ho defisiénsia hetan diskriminasaun.
“Ita-nia maluk joven sira utiliza liafuan ne’ebé la ho dignu no liafuan ne’ebé la presiza uza ba ema ho defisiénsia, dalabarak uza-ain, matan-aat no diuk, entaun fahe informasaun ne’e nune’e ajuda maluk sira futuru bele respeita ita-nia maluk ho defisiénsia, uza liafuan ho dignu,” Fasilitadór Ema ho Defisiensia Munisípiu Baucau, Elisa Maria da Costa, ko’alia iha Uma Dame Vila Nova, tersa ne’e.
Ra’es Hadomi Timor Oan (RHTO) kolabora ho WVTL foka liu bá formasaun ligadu ba asuntu ema ho defisiénsia no jéneru.
Joven na’in-31 ne’e mai suku Uatulari, Waigae, Loilubu, Ostiku no Vemasse Tasi, postu administrativu Vemasse.
Joven hosi Suku Loilubu, Anisa Maria Belo, kontente ho formasaun dahuluk ne’e tanba bele aprende kona-ba ema ho defisiénsia.
“Ami aprende ona, ami sei fó hanoin ba maluk seluk atu uza liafuan ho lolos,” Anisa akresenta.
Jornalista : Natalino Belo
Editór : Evaristo Soares Martins
