DILI, 09 novembru 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, informa nia parte orienta ona ekipa tékniku hodi halo avaliasaun ba programa “Naroman ba Suku”.
Notísia Relevante: SEKOMS kontinua promove programa “Naroman ba Suku” benefisia komunidade rurál
“Ami-nia ekipa halo hela avaliasaun ba programa Naroman Ba Suku no identifika barak mak la’o. Maske balun téknikamente tenke hadi’a hanesan, estrutura balun presiza muda, entaun presiza reforsa. Tanba ne’e, ha’u haruka ona diretór no xefe departamentu sira halo ona avaliasaun no bazea ba avaliasaun ne’e, ita sei hadi’a ne’ebé mak funsiona ita kontinua apoia no ne’ebé la funsiona iha posibilidade la kontinua apoia,” Merício Juvinal dos Reis “Akara” hateten ba jornalista iha JL Villa, Fatuhada, Díli, tersa ne’e.
Tuir nia, Governu liuhosi SEKOMS apoia programa “Naroman ba Suku” liuhosi orsamentu transferensia públika nafatin transfere osan ba sira atu sira fungsiona, maibé depende ba avaliasaun hanesan ba sira-ne’ebé la halo knaar, SEKOMS la transfere osan tan ba sira.
Programa Naroman ba Suku nu’udar programa pilotu hosi VIII Governu Konstitusionál, ho objetivu mak hanesan promove asesu ba informasaun iha suku rurál no hakbiit komunidade sira nia kapasidade asesu ba informasaun.
Programa ne’e buka atu lori informasaun ba nível lokál besik ba komunidade iha suku hodi fó dalan ba komunidade atu hato’o sira-nia preokupasaun ka obstákulu sira-ne’ebé mak sira hasoru hodi aprezenta ba meiu komunikasaun nasionál sira.
Entretantu, Governu implementa ona programa Governu iha povu nia leet “Naroman ba Suku” iha suku 11, hanesan iha munisípiu Lautém, Viqueque, Baucau, Liquiçá, Bobonaro, Ermera, Manufahi, Aileu, Covalima no Ainaro.
Jornalista : Nelia Fernandes
Editór : Cancio Ximenes
