DILI, 9 novembru 2021 (TATOLI)- Diretór Klínika Hospitál Nasionál Guido Valadares (HNGV), Marcelino Correira, informa, Vise Ministru Saúde, Bonifacio “Maucoli” do Reis, daudaun baixa iha Hospitál Nasionál Nasionál Guido Valadares (HNGV) tanba sofre moras hipertensaun no estómagu.
Diretór Klínika HNGV ne’e konta tuir, iha loron 4 novembru, Vise Ministru Saúde kontaktu mai hakarak atu check up kondisaun saúde, tanba ne’e médiku sira halo atendimentu no deteta moras hipertensaun, nune’e médiku espesialista fuan no médiku moras laran rekomenda atu deskansa oituan.
“Bainhira, ita nia Vise Ministru Saúde simu tiha ai-moruk nia fila, maibe horisehik (08/11) mak sente la di’ak nia filafali mai HNGV entaun médiku sira deside fó baixa iha sala VIP no médiku sira halo diagnosa dala ida tan hatudu Vise Ministru sofre moras Hypertensive Heart Disease (HHD) no estómagu,” Diretór Klínika HNGV ne’e, hateteten ba Agência TATOLI, iha HNGV-Bidau, tersa ne’e.
Maski, nia dehan Vise Ministru baixa hela, maibé kondisaun saúde jerál di’ak, tanba médiku espesialista sira fó atendimentu saude intensivu.
Kona-ba atu transfere ba rai li’ur, Diretór ne’e, afirma seidauk simu relatóriu hosi médiku sira, maibé bainhira médiku sira husu atu halo tratamentu iha rai li’ur presiza duni halo transferensia.
”Ita nia médiku sira ne’ebé fó atendimentu hato’o relatóriu katak presiza halo duni tratamentu iha rai li’ur no haree ba ita-nia ekipamentu sira laiha bele transferensia ba ospitál sira ne’ebé mak iha ekipamentu kompletu atu atende lalais,” nia akresenta.
Tuir nian, Vise Ministru nia moras hipertensaun no estómagu ne’e kle’ur ona no mós halo operasaun ba fuan iha Malazia.
Nune’e, Diretór Klínika HNGV ne’e husu ba lider-sira bainhira iha moras risku ruma tenke check up kada loron atu médiku sira bele fó atendimentu médiku sedu.
Jornalista : Felicidade Ximenes
Editór : Florencio Miranda Ximenes
