COVALIMA, 10 novembru 2021 (TATOLI)—Administradór Munisípiu Covalima, Francisco de Andrade, hasai ona karta hodi husu ba komunidade atu dada-sa’e bandeira RDTL iha ida-idak nia uma oin, relasiona ba komemorasaun loron Proklamasaun Independénsia ba dala-46 (28 novembru 1975-2021).
“Ha’u mak hasai karta husu ba komisaun organizadora halo avizu iha Covalima hodi husu komunidade atu dada-sa’e bandeira iha ida idak nia uma oin,” Administradór Covalima informa ba Agência Tatoli, iha nia servisu fatin, kuarta ne’e.
Komisaun organizadora iha loron 09 fulan-novembru fó sai ona avizu hodi husu ba komunidade atu dada-sa’e bandeira RDTL iha ida-idak nia uma oink a uma leten atu valoriza eroi sira-nia mate no sakrifika sira-nia an ba rai ida-ne’e.
“Povu tomak iha nasionalizmu no patrorizmu ne’ebé forti tanba Timor hetan independénsia la’ós ho gratuita maibe ema barak mak fò sira-nia vida tomak fo an ba mate. Ho sira-nia terus mak ita bele goza hodi hetan ukun rasik an. Ita tenke valoriza sira nia sakrifísiu,” nia dehan.
Tuir nia, atu komemora loron proklamasaun independénsia, Covalima rasik forma ona komisaun organizadora no fó orientasaun ba administradór hodi fó avizu ba komunidade iha postu sira atu dada-sa’e badeira RDTL iha ida-idak nia uma oin.
“Ha’u mós aprova orsamentu kuaze $12,000-resin, ne’ebé mai hosi Orsamentu Jerál Estadu tinan 2021,” nia hatetem.
Jornalista : Celestina Teles
Editór : Cancio Ximenes
