DILI, 10 novembru 2021 (TATOLI)– Família haloot ona eis Embaixadór Timor-Leste ba Malázia no Fundandór Fundasaun Anuur, Djafar Bin Amude Alkatiri, iha semitériu muslumanu Taibesi.
Informasaun ne’ebé Agência TATOLI asesu hosi parte família katak, durante ne’e matebian sofre hela moras diabetes no halo hela tratamentu iha maternidade fatumeta, maibé iha loron 6 novembru, médiku no família deside transfere ba halo tratamentu iha Ospitál Royal Bali, nune’e iha loron 09 novembru matebian hakotu iis.
Mate-isin transporta hosi Bali-Indonezia ho aviaun Air Asia no to’o iha Timor-Leste iha tuku 12:00, otl.
Molok, haloot mate-isin, família transporta mate-isin ba rezidénsia Fatuhada no kontinua ba Mesjid Anuur Kampu Alór-Dili hodi hala’o seremonia kultura muslumanu, hafoin hala’o seremonia funebre iha semitériu muslumanu Taibesi, tuku 3:00 otl.
Matebian husik hela feen no oan-ki’ak hamutuk neen, hanesan feto tolu no mane tolu.
Matebian Djafar Alkatiri, moris iha loron 4 agostu 1947, hanesan oan daruak hosi maun-alin na’in-12.
Iha Primeiru Governu Konstitusionál asume Embaixadór Timor-Leste ba Malázia hahú iha 2002 to’o 2006.
Iha 1975, Djafar Alkatiri mós sai membru ba estrutura partidu FRETILIN hodi ka’er asuntu politika no saúde.
Alende ne’e, matebian hanesan fundador fundasaun Anuur no mós Eis Prezidente ba Komunidade musulmanu iha Timor Leste.
Jornalista : Felicidade Ximenes
Editór: : Florencio Miranda Ximenes
