DILI, 10 novembru 2021 (TATOLI)-–Ministériu Finansa (MF) liuhosi Sekretariadu Tékniku Fundu COVID-19 iha loron 09 novembru 2021 halo ona pagamentu suplementu remuneratóriu ba FALINTIL Forsa Defeza Timor-Leste (F-FDTL) ne’ebé konsidera hanesan liña frente hamutuk 2.100 ho montante millaun $6,4.
Aleinde ne’e, iha outubru nia rohan, MF realiza ona pagamentu suplementu remuneratóriu ba membru Polísia Nasionál Timor-Leste (PNTL) hamutuk 3.821 ho montante millaun $5,1.
Notísia relevante: MF halo pagamentu suplementu remuneratóriu ba membru PNTL 3.821
“Ministériu Finansa realiza ona pagamentu suplementu remuneratóriu liña frente ba pesoál Sentru Integradu Jestaun Krize (CIGC, sigla portugés) hamutuk na’in-449 ho montante $322.925, iha loron 18 outubru,” refere nota hosi MF ne’ebé Agência TATOLI, kuarta ne’e.
Halo mós pagamentu ona ba membru Polísia Migrasaun hamutuk 143 ho montante $158.790
Nune’e, to’o iha loron 08 novembru 2021, MF ezekuta ona pagamentu suplementu remuneratóriu liña frente ho montante milliaun $12,7 ka 25%, hosi orsamentu alokadu hamutuk milliaun $51,9.
Notísia relevante: Ezekusaun reál OJE 2021 iha inísiu novembru atinje 52%
Enkuantu, taxa ezekusaun reál Fundu COVID-19 to’o iha loron 08 novembru atinje ona milliaun $124,2 ka 43% hosi orsamentu alokadu milliaun $287,6.
Jornalista : Arminda Fonseca
Editora : Julia Chatarina
