DILI, 11 novembru 2021 (TATOLI)–Governu liuhosi reuniaun Konsellu Ministru (KM) aprova Projetu Dekretu-Lei ba kriasaun subsídiu ba profisionál sira ne’ebé dezenvolve atividade jornalístika, ne’ebé Governu husu hodi fornese informasaun kona-ba mitigasaun COVID-19.
Projetu Dekretu-Lei ne’e aprezenta hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo.
“Profisionál sira ne’e hala’o ona sira-nia funsaun ho forma ezemplár hodi kontribui ativamente ba divulgasaun informasaun ne’ebé kredível no nesesária kona-ba prevensaun no kombate pandemia iha territóriu nasionál,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kinta ne’e.
Notísia relevante: Pagamentu suplementu remuneratóriu ba liña frente hosi fevereiru to’o dezembru
Nune’e, lista profisionál sira ne’ebé sei hetan benefísiu iha subsídiu ne’e, sei aprova hosi despaixu hosi MAPKOMS, ho baze iha informasaun ne’ebé fornese hosi Sala Situasaun, Sentru Integradu Jestaun Krize (CIGC, sigla portugées) ka hosi Diresaun Nasionál Diseminasaun Informasaun.
Jornalista : Antónia Gusmão
Editora : Julia Chatarina
