DILI, 9 novembru 2021 (TATOLI)- Tuir dadus hosi Ministériu Saúde kona-ba progresu imunizasaun COVID-19 ba sidadaun ho idade 12 no menus hosi 18 ne’ebé simu ona vasina Pfizer atinje ona 8.3%.
“Populasaun ho idade 12 no menus hosi 18 ne’ebé simu ona vasina Pfizer doze dahuluk 3.8%, ne’ebé ekivalente ho ema 15,002,” refere nota ne’ebé Agência TATOLI asesu, kuarta ne’e.
Estudante ho idade 12 to’o 17 iha munisípiu Dili no munisípiu seluk simu ona vasina Pfizer hodi proteje ho efikásia 95% hosi infesaun sintomátika SARS-CoV-2.
Governu liuhosi Ministériu Saúde lansa ona vasina Pfizer doze dahuluk, hahú 27 outubru to’o novembru 19, hafoin 20 novembru tama ba doze daruak.
MS mós define doze daruak hosi vasina ne’e sei administra ho intervalu loron 21.
Tuir planu vasinasaun ne’e sei realiza iha eskola sira no ba alunu foin-sa’e 50.000-sira hosi 60 to’o 110 ano, hosi munisípiu pre selesionadu ne’ebé maka sei simu vasina ba dahuluk.
Timor-Leste rejista totál kazu konfirmadu pozitivu COVID-19 ba labarik tinan 18 mai kraik na’in-3.661 (19%) no óbitu na’in-13 (11%).
Entretantu, totál vasina AstraZeneca no SINOVAC ne’ebé fó ona ba sidadaun ho idade 18 ba leten iha territóriu nasionál hamutuk 976,580.
Hosi totál ne’e, populasaun elijível tinan 18 ba leten, ne’ebé simu ona vasina iha loron 9 novembru , tuir sistema informasaun Saúde iha Ministériu Saúde, hanesan kumulativu 1ª doze iha Dili (83,2%) no kumulativu 2ª doze iha Dili (74,1%).
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 75,9% no simu ona doze daruak 50,3%.
Sala Situasaun, Sentru Integradu Jestaun Krize (CIGC, sigla Portugés) relata, ohin (09/11), kazu detetadu foun na’in lima, rekuperadu laiha, no kazu ativu 10.
Nune’e, hahú 21 marsu 2020 to’o 9 novembru 2021 iha kumulativu kazu konfirmadu 19.804 no óbitu 122.
Notísia Relevante: COVID-19: kazu detetadu pozitivu tolu no ativu 13
Jornalista : Felicidade Ximenes
Editór : Florencio Miranda Ximenes
